وەزیری كشتوكاڵی هەرێم هۆكاری بەرزبوونەوەی نرخی مریشك ئاشكرادەكات و ڕاشیدەگەیەنێت پێشتر لێخۆشبوونی باج لەسەر عەلەف و پێكهاتەكانی تایبەت بە عەلەف كراون و ئاسانكاری بۆ خاوەنی كێڵگە پەلەوەرییەكان كراوە.
بێگەرد تاڵەبانی وەزیری كشتوكاڵی هەرێم لە كۆنگرەیەكی ڕۆژنامەوانیدا ڕایگەیاند، بەرزبوونەوەی نرخی مریشك بەهۆی بەرزبوونەوەی نرخی عەلەفەوە بووە و ئێمە بە هەموو شێوەیەك هاوكاریی خاوەن كێڵگە پەلەوەرییەكان دەبین”.
ئاماژەی بۆ ئەوەش كرد، “بۆ كەمكردنەوەی نرخی مریشك چەند هەنگاوێك نراوە كە تایبەت بە لێخۆشبوونی باج لەسەر عەلەف و پێكهاتەكانی كە نرخەكەیان داببەزێت بە جۆرێك كە نرخی مریشك بەرزنەبێتەوە و لەگەڵ وەزارەتی سامانە سروشتییەكانیش هەوڵدەدەین لە دابینكردنی گازدا هاوكاریی كێڵگە پەلەوەرییەكان بكرێت و هەموو هەوڵێكمان بۆ ئەوەیە نرخی مریشك بەرز نەبێتەوە”.
