نەتەوە یەكگرتووەكان رایدەگەیەنێت، ژمارەی دانیشتووانی جیهان لە 15ی تشرینی دووەمی داهاتوودا هەشت ملیار كەس تێدەپەڕێنێت و دەشێت بگاتە 10 ملیار لە ساڵی 2050دا.
لەكاتێكدا ژمارەی گشتیی دانیشتووان لە ساڵی 1800دا تەنها یەك ملیار بووە، نەتەوە یەكگرتووەكان لە راپۆرتێكدا كە لەلایەن پەیمانگای نیشتمانیی توێژینەوەی دیمۆگرافییەوە بڵاوكراوەتەوە دەڵێت، مرۆڤایەتی هەشت ملیار كەس لە 15ی تشرینی دووەمدا تێدەپەڕێنێت، لەگەڵ هەموو كێشەكانی ئایندە و بەتایبەتیش پرسەكانی ژینگە
لەگەڵ باشتربوونی ژیان و تەمەنی درێژی پێشبینیكراو، نەوەكان بەردەوامن لە زیادبوون و پێكەوەژیان و ئەمەش بە بەردەوامی ژمارەی دانیشتووان زیاددەكات.
جیل بیزۆن، شارەزای فەرەنسی بواری دیموگرافی دەڵێت، پێشبینییەكان تا ساڵی 2050 راستەقینەن، چونكە زۆرینەی ئەو كەسانەی دەژین و وەچە دەخەنەوە بە كردەیی لەدایكبوون.
وەچەخستنەوە رۆڵی دەبێت لە تێكچوونی دیمۆگرافیای پێشبینیكراو لە كۆتایی سەدەی بیست و یەكدا. بەر لە 50 ساڵ، بەشێوەی ناوەندی پێنج منداڵ لەهەر ژنێك لەدایك دەبوون، بەڵام ئێستا تەنها 2.3یە بۆ هەر ژنێك، ژمارەكە روو لە كەمبوونەوەی زیاتر دەكات لە دەیەكانی داهاتوودا.
لە سەروو ئەوانەشەوە، ناوەندی رێژەی لەدایكبوون دژیەكە بەپێی ناوچەكانی جیهان، بیزۆن دەڵێت، “دوو لەسەر سێی مرۆڤ لەو ناوچانە دەژین كە تیایدا ناوەندی وەچەخستنەوە 2.1 منداڵە بۆ هەر ژنێك” وەك ئەوەی لە ئەوروپا، ئەمریكا و ئاسیادا هەیە.
بەپێی راپۆرتەكە، “كەمترین رێژەی وەچەخستنەوە لە كۆریای باشوورە بە 0.9 منداڵ بۆ هەر ژنێك، زۆرترین رێژەش لە نەیجیریایە كە دەگاتە 6.7 منداڵ بۆ هەر ژنێك”.
بە تەنها كیشوەری ئەفریقا ئەنجامی پێچەوانەی هەیە بەرامبەر ئەودوای كیشوەرەكان و بە بەردەوامی لە رووی دیمۆگرافی و رێژەی وەچەخستنەوە و بەرزی منداڵبوونەوە زۆر بەرزە. لە ئێستادا كە 1.4 ملیار كەسە، بەتەنها خۆی لە ساڵی 2050دا دەگاتە نزیكەی 2.5 ملیار كەس، واتە یەك لە كۆی چواری دانیشتووانی جیهان ئەفریقی دەبێت، دواتریش چوار ملیار لە 2100دا، واتە زیاتر لە یەك لە كۆی سێ كەسی دانیشتووان.
بە گەیشتنە كۆتایی سەدەی 21، رێژەی مردن، رێژەی لەدایكبووان تێدەپەڕێنێت بەهۆی لاوازبوونی گەشەی دانیشتووان لە جیهاندا، ئەوكاتیش پیربوونی دانیشتووان دەبێتە ئالنگاریی سەدەی داهاتوو.
