بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازیکرد لە جەنەراڵ ماتیۆ مەکفارلان، فەرماندەی گشتیی ھێزەکانی ھاوپەیمانان لە عێراق و سوریا.
لە کۆبوونەوەکەدا كە جەلال شێخ ناجی، سەرۆکی ئاژانسی پاراستن و زانیاری/ زانیاری و لیوا روکن عومەر ساڵح، سەرۆکی دەستەی ئەرکانی ھێزەکانی حەفتا و وەھاب ھەڵەبجەیی، بەڕێوەبەری گشتیی دەزگای دژەتیرۆر ئامادەیبوون، دوایین گۆڕانكارییە سیاسییەكان، سەرخستنی پرۆسەی چاكسازی، رێكخستنەوەی هێزی پێشمەرگە و رووبەڕووبوونەوەی پاشماوەكانی داعش تاوتوێكران.
لە درێژەی کۆبوونەوەکەدا جەخت لە فراوانکردنی پەیوەندی و ھەماھەنگیی بەردەوامی نێوان ھێزەکانی ھەرێم، ھاوپەیمانان و عێراق کرایەوە لە پێناو رووبەڕووبوونەوەی تیرۆر و پاراستنی ئارامی و ئاسایش لە ناوچەكە.
سەرۆک بافڵ جەلال تاڵەبانی پیرۆزبایی لە جەنەراڵ ماتیۆ کرد بە بۆنەی دەستبەکاربوون لە ئەرکە نوێکەی و سەبارەت بە یەكخستنەوە و چاكسازی لەناو هێزەكانی پێشمەرگەش هەڵوێستی حزبەكەی روونكردەوە و وتی، “بە پەرۆشەوە لە یەكخستنەوەی هێزی پێشمەرگە و دروستكردنی هێزێكی نیشتمانیی تۆكمە دەڕوانین، بە شێوەیەك كە پارێزەری هەرێم و بەرژەوەندییە باڵاكان بێت. بۆ ئەمەش پێویستە یەكسانی و هاوسەنگی لەبەرچاوبگیرێن”، داواشیكرد هێزەكانی هاوپەیمانان لە پێشخستنی توانا سەربازییەكانی هێزی پێشمەرگە بەردەوامبن و هاوكارییەكانیان فراوانتربكەن.
