ناوەندی پێدانی ڤیزای تورکیا لە هەرێمی کوردستان، هۆشداری دەدات لە زۆربوونی سکاڵاکان لەبارەی ڤیزای ساختەی تورکیاوە، بەپێی ڕاگەیەندراوی ناوەندەکە ئەو ڤیزایانە لە شوێنە نافەرمییەکانەوە دەدرێن و ڕێگەی چوونە ناو خاکی تورکیایان پێنادرێت.
لە ڕاگەیەندراوێکی ناوەندی پێدانی ڤیزای تورکیا لە عێراق و هەرێمی کوردستاندا هاتووە، “لەم مانگانەی دواییدا ژمارەیەکی زۆر لە سکاڵامان پێگەیشتووە لەلایەن کەسانێکەوە کە ستەمیانلێکراوە بە پێدانی ڤیزا لەلایەنی نافەرمییەوە بەدەر لە ناوەندەکانی سەر بە ئێمە و پەیوەندیدار بە نوێنەرایەتییەکانی تورکیا”.
ئاماژە بەوەشکراوە، کە ئەو کەسانە ڕێگەی چوونە ناو خاکی تورکیایان لێکراوە و لە دەروازەکانەوە گەڕێنراونەتەوە بەهۆی ئەوەی ڤیزاکانیان ساختەبووە.
جەختیشکراوەتەوە، “سەرجەم ئەو ڤیزایانەی لەلایەن ناوەندەکانمان و نوێنەرایەتییەکانی تورکیاوە پەسەندنەکرابن ساختەن و کاریان پێناکرێت”.
ناوەندی پێدانی ڤیزای تورکیا ڕایگەیاندووە، ئەو ڤیزایانەی لەڕێگەی تۆڕە کۆمەڵایەتییەکانەوە ڕێکلامیان بۆ دەکرێت و بەدەستدەهێنرێن، ڤیزای ساختەن و دەبێتەهۆی گەڕاندنەوەیان لە دەروازەکانەوە.
