شارەوانیی سلێمانی دانیشتوانی ئەو گوندانە ئاگاداردەکاتەوە کە بڕیاری فراوانکردنی سنوورەکانیان بۆ دەرچووە کە بەبێ رێگەپێدانی شارەوانی خانوو دروستنەکەن و هەیکەل تەواونەکەن.
سەرۆکایەتیی شارەوانیی سلێمانی بڵاویکردووەتەوە، لە رێگەی تیمەکانمان لە بەشی زیادەڕەویی تێبینیمان کردووە کە تێگەیشتنێکی هەڵە بۆ فراوانکردنی حەرەمی 28 گوندەکە لە ئارادایە و بەهۆیەوە کۆمەڵێک هاوڵاتیی بەبێ رێگەپێدانی شارەوانی کەوتوونەتە تەواوکردنی هەیکەل و دروستکردنی خانوو.
ئاماژەی بەوەشکردووە، ئەوەی پێویستە هاوڵاتییان بیزانن ئەوەیە کە حەرەمی ئەو 28 گوندە بەپێی نەخشەی کادسترۆ دیاریدەکرێت نەک بەپێی نەخشەی شارەوانی، بۆیە ئەو زەوی و خانووانەی کە دەکەونە نەخشەی شارەوانی کە بۆ گوندەکە کراوە مەرج نییە بکەونە حەرەمی گوندەکەشەوە، بە تایبەت گوندەکانی مەلاداود و هوانە و کانی شینکە، چونکە حەرەمی ئەو سێ گوندە بچووکە و زۆربەی زەوی و خانووەکانی ئەو سێ گوندە دەکەوێتە دەرەوەی حەرەمی گوندەکەوە.
داوایشیکرد، بەبێ رێگەپێدانی شارەوانی خانوو دروستنەکەن و هەیکەل تەواونەکەن، شارەوانیمان بەرپرس نییە لە هەر زەرەر و زیانێک کە بەهۆی دروستکردنی خانوو بەبێ رێگەپێدان بەر هاوڵاتییان بکەوێت.
