وەزارەتی خوێندنی باڵای هەرێم، پاڵپشت بە ڕێنماییەكان 22 پۆست لە زانكۆی سلێمانی بۆ جاری یەكەم ڕادەگەیەنێت، ئەو كەسانەی داواكاری پێشكەشدەكەن پێویستە هەڵگری بڕوانامەی دكتۆرا بن و خزمەتی زانكۆییان لە 10 ساڵ كەمتر نەبێت.
بەپێی ڕاگەیەندراوێكی وەزارەتی خوێندنی باڵا و توێژینەوەی زانستیی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە،” 22 پۆست بەپێی مەرج و ڕێنماییەكان لە زانكۆی سلێمانی ڕادەگەیەنن، پۆستەكانیش هەریەك لە پۆستی یاریدەدەری سەرۆكی زانكۆ بۆ كاروباری زانستی و خوێندنی باڵا لەگەڵ ڕاگری كۆلێژەكانی (زانست، زانستە مرۆڤایەتیەكان، پەرستاری، هونەرە جوانەكان، پزیشكی ڤێتێرنەری، زانستە ئەندازیاریە كشتوكاڵیەكان، زانستە ڕامیارییەكان، پەروەردەی زانستە مرۆڤایەتیەكان، پەروەردە، پەروەردەی بنەڕەتی، یاسا، زانستە ئیسلامیەكان، ئەندازیاری، پزیشكی ددان، بازرگانی، دەرمانسازی، زانستە سروشتیەكان، پەروەردەی جەستەیی و زانستە وەرزشییەكان، كۆلێژی زمان، كارگێری و ئابوری و پزیشكی).
مەرجەكان:
– هەڵگری بڕوانامەی دكتۆرا بێت.
– نازناوی زانستی لە پڕۆفیسۆری یاریدەدەر كەمتر نەبێت.
– خزمەتی زانكۆیی لە (10) ساڵ كەمتر نەبێت.
لە ڕاگەیەندراوەكەدا هاتووە، ئەو كەسەی داواكاری پێشكەشدەكات، باشترە دید و بۆچوون و بەرنامەی كاری خۆی پێشكەشبكات بۆ بەرەوپێشبردنی زانكۆ بۆ ئەو چوار ساڵەی كە پۆستەكە وەردەگرێت.
– زانینی زمانی ئینگلیزی و شارەزایی لە بەكارهێنانی تەكنەلۆژیای بواری خوێندن و فێركردن و كارایی بڵاوكردنەوەی توێژینەوەی زانستی، هەلی زیاتر بۆ پێشكەشكار دەڕەخسێنیت.
– دواوادە بۆ پێشكەشكردن (سی ڤی یەكە)، (پوختەی ڕاژەكەی) ، ( یەكەمین فەرمانی زانكۆیی بەدەستهێنانی نازناوی زانستی و لیستی ناو و ناونیشانی توێژینەوە زانستیە بڵاوكراوەكان(، كۆتایی دەوامی ڕۆژی یەكشەممە (2-10-2022)ە و لەم بەستەرە (https://forms.gle/AgbJ6B8g68VTLNQ27 ) دەبێت.
– ئاماژە بۆ ئەوەش كراوە، پێویستە پوختەی ڕاژەی لەلایەن سەرۆكایەتیی زانكۆوە پەسندكرابێت.
