وەزیری تەندروستی هەرێم رایگەیاند، هەموو کات چاودێریی دۆخی هەموو نەخۆشییەکی گواستراوە دەکەین، بە دڵنیایی هیچ رێکارێک ناکەین بارگرانی بۆ کار و کەسابەتی هاوڵاتیی دروستبکات.
سامان بەرزنجی وەزیری تەندروستیی هەرێم ئەمڕۆ سێشەممە رایگەیاند، “هەر رێکارێک بۆ بەرەنگاربوونەوەی هەر گومانێکی ڤایرۆسێکی نوێ تەنها مەبەست بەرژەوەندی هاوڵاتییان و خۆپارێزی دەبێت لە تەشەنەکردن، بە دڵنیایی هیچ رێکارێک ناکەین بارگرانی بۆ کار و کەسابەتی هاوڵاتیی دروستبکات و هەموو کاتیش چاودێری دۆخی هەموو نەخۆشیەکی گواستراوە دەکەین”.
ئاماژەی بەوەش کرد، “لە هەرێمی کوردستان دوو ملیۆن و 931 هەزار و 474 ژەمە ڤاکسینی دژە کۆرۆنا بە هاوڵاتییان دراوە کە بە نزیکەیی نیوەی دانیشتوان بەلایەنی کەم ژەمێک یان دوو ژەمی ڤاکسینی پێدراوە”.
ئاشکراشیکرد، “49.6 % هاوڵاتیی سەروو 18 ساڵ ژەمی یەکەمیان وەرگرتووە،40.2% هاوڵاتیی سەروو 18 ساڵ ژەمی دووەمیان وەرگرتووە، تەنها لە 2% ی هاوڵاتیانیی سەروو 18 ساڵ ژەمی سێیەمیان وەرگرتووە، لەکاتێکدا هاوڵاتیانیی سەروو 12 ساڵی 37% ژەمی یەکەم و 30% ژەمی دووەم و 1% ژەمی سێیەمیان وەرگرتووە”.
