جێگری سەرۆكی فراكسیۆنی یەكێتی لە پەرلەمانی كوردستان ڕایدەگەیەنێت، خوێندنەوەی یەكەم بۆ پڕۆژەیاسای نوێی كار كراوە، ئاشكرایدەكات پشتیوانی لە داواكەی جێگری سەرۆك وەزیرانی هەرێم دەكەن و پڕۆژەیاساكە پەسەنددەكرێت.
لوقمان وەردی جێگری سەرۆكی فراكسیۆنی یەكێتیی نیشتمانیی كوردستان لە پەرلەمانی كوردستان لە لێدوانێكدا بە تۆڕی میدیایی ئێستای ڕاگەیاند، پڕۆژە یاسای نوێی كار خوێندنەوەی یەكەمی بۆ كراوە و ئامادەكراوە خوێندنەوەی دووەمی بۆ بكرێت و بڕیارە دوای پێشنیازەیاسای پەروەردە بخرێتە بەرنامەی كارەوە و پەسەندبكرێت و هەوڵدەدرێت بەشێوازێك پەسەندبكرێت كە لە بەرژەوەندیی ئەو كەسانە بێت كە لە كەرتی تایبەتدا كاردەكەن و خانەنشینییان بۆ ئەژماربكرێت.
ئاشكرایكرد، وەكو فراكسیۆنی یەكێتی بە هەموو شێوەیەك پشتیوانی لە داواكەی قوباد تاڵەبانی جێگری سەرۆك وەزیران دەكەین كە داوایكردوو بە زووترین كات پڕۆژەیاساكە پەسەندبكرێت و پێمانوایە بۆشایی یاسایی لەو بوارەدا هەیە چونكە دواجار لە خزمەتی كارمەندان و ئەو كەسانەیە كە كەرتی تایبەتدا كاردەكەن.
