لە چێوەی هەڵمەتێكدا بۆ بنەبڕكردنی توندوتیژی دژی ژنان، جێگری سەرۆک وەزیرانی هەرێم سەردانی هەردوو وەزارەتی کار و رۆشنبیری كرد و ڕایدەگەیەنێت، بنەبڕکردنی توندوتیژی پێویستی بە چارەسەری ڕیشەیی و هاوکاری حکومەت و کۆمەڵگای مەدەنی هەیە.
قوباد تاڵەبانی، جێگری سەرۆک وەزیرانی هەرێمی كوردستان ئەمڕۆ لە یەکەم سەردانیدا لەگەڵ وەزیری کار و کاروباری کۆمەڵایەتی و بەڕێوەبەرانی شێڵتەرەکان و بەشی جێندەری وەزارەت کۆبووەوە و تاوتوێی چۆنییەتی بنبڕکردنی توندوتیژی و ڕێکخستنەوەی کاروباری شێڵتەرەکانیان کرد.
قوباد تاڵەبانی ئاماژەی بەوەدا نەهێشتنی توندوتیژی پێویستی بە چارەسەری ڕیشەیی و هەماهەنگی و هاوکاری حکومەت و کۆمەڵگای مەدەنی هەیە و وتی، “یاساکان و ڕێنماییەکان دەبێت بەجۆرێک ڕێکبخرێنەوە کە ئاسانکاری بکەن بۆ بەرگرتن بە توندوتیژی و ڕاپەڕاندنی کاروباری شێڵتەرەکان. بۆ ئەو مەبەستەش پێشنیارکرا سوود لە ڕێکخراوەکان ببینرێت بۆ داڕشتنی میکانیزمێکی گۆنجاوی کارکردن”.
لە کۆبوونەوەکەدا بەرپرسانی شێڵتەرەکان تێبینی و گرفتەکانی خۆیان خستەڕوو و بڕیاردرا بەپێی پێویست چارەسەری کێشەکانیان بکرێت. جێگری سەرۆک وەزیرانیش جەختی کردەوە هاوکاری شێڵتەرەکان دەبێت و ڕێگری دەکات لەهەر دەستتێوەردانێک کە کێشە و گرفتیان بۆ دروستبکات.
دواتر سەردانی وەزارەتی ڕۆشنبیری و لاوانی کرد و لەگەڵ وەزیر و بەرپرسانی وەزارەت گفتۆگۆیان کرد لەبارەی چۆنییەتی مامەڵەکردن لەگەڵ کەیسەکانی توندوتیژی و بەتایبەتیش لە کەناڵەکانی ڕاگەیاندن، هەروەها چۆنییەتی بڵاوکردنەوەی هۆشیاری کۆمەڵایەتی لەڕێی میدیا و لایەنە پەیوەندیدارەکانی دیکەوە تاوتوێکرا.
لە کۆبوونەوەکەدا ڕاپۆرتێک لەبارەی پرسی توندوتیژی دژ بە ژنان خرایەڕوو کە کۆمەڵێک گرفت و ڕاسپاردەی لەخۆگرتبوو. پاش گفتوگۆیەکی ورد، جەخت لەسەر چەند خاڵێک کرایەوە لەوانە، هەموارکردنەوەی یاساکان و توندکردنی سزاکان و قەدەغەکردنی چەک و ئەنجامدانی هەڵمەتی هۆشیاری و پێویستیی هەماهەنگی کەناڵەکانی ڕاگەیاندن لەگەڵ دامەزراوەکانی حکومەت و ڕێکخراوەکانی کۆمەڵگای مەدەنی.
هەر لە چێوەی ئەو هەڵمەتەدا، پێشتر قوباد تاڵەبانی سەردانی وەزارەتی ئەوقاف و کاروباری ئاینی کرد و لەگەڵ یەکێتی زانایانی ئایینی کۆبووەوە و داوایلێکردن لەڕێی مینبەرەکانیانەوە بەشداربن لە بەرەنگاربوونی توندوتیژی دژی ژنان. هەروەها سەردانی بەڕێوبەرایەتیی بەرەنگاربوونەوەی توندوتیژی دژی ئافرەتان و خێزان کردوە و بڕیاریشە بۆ هەمان مەبەست سەردانی چەند وەزارەتێک و لایەنە پەیوەندیدارەكانی دیكە بکات.
