سەربازێکی کورد لە ناو ڕیزەکانی هێزەکانی کۆماری ئیسلامیی ئێران لەلایەن فەرماندەکەیەوە کوژرا، کەسوکارەکەی دەڵێن بەهۆی جیاوازیی نەتەوایەتی و مەزهەبییەوە بووە.
ڕێکخراوی هەنگاو بۆ مافەکانی مرۆڤ لە ڕۆژهەڵاتی کوردستان بڵاویکردەوە، سەربازێکی کوردی خەڵکی سەڵماس ڕۆژی پێنج شەممەی ڕابردوو لەلایەن فەرماندەکەیەوە کوژراوە.
ئەو گەنجە کوردە، ناوی موحەڕەم ئەشرەفی بووە و تەمەنی 22 ساڵ بووە، تەنها 40 ڕۆژی مابوو بۆ تەواوکردنی ماوەی سەربازییەکەی.
کەسوکاری موحەڕەم باسیان لەوەکردووە، لە چەند مانگی ڕابردوودا فەرماندەکەی کوڕەکەیان بەهۆی کێشەی نەتەوەیی و مەزهەبییەوە چەند جارێکی شەڕی کردووە لەگەڵیدا و هەڕەشەی کوشتنیشی لێکردووە.
هێزە ئەمنییەکان بە بنەماڵەی موحەڕەمیان وتووە کە ڕووداوەکە بە مەبەست نەبووە و هەڕەشەی بڵاوکردنەوەشیان لێکردوون.
