پێكهاتەكانی هەرێمی كوردستان، داوادەكەن هێزە ئەمنییەكان لە بری دەنگدەرانی ئەوان دەنگنەدەن و دەڵێن، “زیاتر لە 60%ی دەنگەكانمان لە هێزە ئەمنییەكانەوە دێن”.
لە كۆنگرەیەكی ڕۆژنامەوانیدا كە ئەمڕۆ یەكشەممە لە هەولێر بەڕێوەچوو، نوێنەری كۆتاكان و حزبە سیاسییەكانی پێكهاتەكانی كلدانی، سریانی، ئاشووری و توركمان لە هەرێمی كوردستان چەند داواكارییەكیان خستەڕوو.
نوێنەری پێكهاتە و كۆتاكان داوایانكرد هێزەكانی زێرەڤانی و پێشمەرگە و هێزە ئەمنییەكان دەنگ بە كاندیدەكانیان نەدەن و ئاشكرایانكرد، زیاتر لە 60%ی دەنگەكانیان لە هێزە ئەمنییەكانەوە دێن.
ئەوان سەرسووڕمانی خۆیان نیشاندا لەوەی كاندیدەكانیان بەبێ ئەوەی دەنگی پێویستی پێكهاتەكانی خۆیان، هەروەها كۆتای ژنان بەبێ ئەوەی دەنگی پێویستی دەنگدەرانیان بەدەستبهێنن، دەچنە پەرلەمان و ڕایانگەیاند، “ئەگەر كاندیدەكانمان بە دەنگی پێكهاتەكانی خۆیان نەچنە پەرلەمان، ئەوا چۆن حزبەكانیان بتوانن لێپرسینەوەیان لەگەڵدا بكەن؟!”.
یەكێكی تر لە داواكارییەكانی پێكهاتەكانی كلدانی، سریانی، ئاشووری و توركمان، زیادكردنی ژمارەی كورسییەكانی كۆتاكان بوو بە جۆرێك كە لەگەڵ زیادبوونی ژمارەی پێكهاتەكانیاندا بگونجێت.
نوێنەری پێكهاتە و كۆتاكان داوایانكرد ناوەندی دەنگدانی تایبەت بە كۆتاكان و ڕۆژی تایبەتیشیان هەبێت كە ڕۆژێك بەر لە دەنگدانی گشتی ئەوان بتوانن دەنگبدەن، تەنانەت كارتی دەنگدانی تایبەت بە خۆیان هەبێت.
