شاندێکی ڕۆژئاوای کوردستان لە فەڕەنسا، لەگەڵ ئیمانیۆل ماکرۆن، سەرۆکی فەڕەنسا کۆبوونەوە و بەپێی زانیارییەکان لە کۆبوونەوەکەدا باس لە پشتگیری ڕۆژئاوا کراوە لەلایەن ئەوروپاوە.
بەپێی زانیارییەکانی ئاژانسی هاوار لە ڕۆژئاوای کوردستان، ئیلهام ئەحمەد هاوسەرۆکی دەستەى بەڕێوەبەری ئەنجوومەنی سوریای دیموکراتیک (مەسەدە / MSD)، بێریڤان خالید هاوسەرۆکی ئەنجوومەنی بەڕێوەبەری بەڕێوەبەرایەتیی خۆسەری باکوور – رۆژهەڵاتی سوریا و خەسان یوسف، هاوسەرۆکی ئەنجوومەنی بەڕێوەبەری بەڕێوەبەرایەتیی مەدەنیی دێرەزۆر لەگەڵ ئیمانوئیل ماکرۆن سەرۆک کۆماری فەرەنسا کۆبوونەتەوە.
هاوکات میدیا فەڕەنسییەکان کۆبوونەوەی شاندەکەی ڕۆژئاوای کوردستان و ئیمانیۆل ماکرۆنیان پشڕاستکردووەتەوە و دەڵێن، لە کۆبوونەوە تایبەت بووە بە پشتگیری فەڕەنسا لە کوردانی سوریا بۆ ڕوبەڕوبوونەوەی داعش و هاوکاری مرۆی بۆیان.
شاندەکەی ڕۆژئاوای کوردستان جەختیان لەوە کردووەتەوە هاوکارییە مرۆییەکان بۆ ڕۆژئاوا گرنگە و داخستنی سنورەکان بەسەر ڕۆژئاوادا کارەسات دروست دەکات.
کۆبوونەوەی شاندەکەی ڕۆژئاوای کوردستان و ئیمانیۆل ماکرۆنی سەرۆکی فەڕەنسا، لە کاتێکدایەم کە بەرپرسانی ڕۆژئاوا هەڵمەتێکیان بۆ بە فەرمی ناساندنی خۆبەڕێوەبەری ڕۆژئاوا دەستپێکردووە و داوای پشتگیری نێودەوڵەتی دەکەن.
