كۆڵبەرێكی گەنجی خەڵكی بانە بە تەقەی هێزەكانی ئێران كوژرا، وەك ئەوەی ڕێكخراوێكی بواری مافی مرۆڤ دەیڵێت.
ڕێكخراوی مافی مرۆڤی هەنگاو بڵاویكردەوە، كۆڵبەرێكی گەنجی كورد بە ناوی (ڕێبوار ڕەشیدی)ی تەمەن 30 ساڵ، بەیانی ئەمڕۆ لەلایەن هێزە چەکدارەکانی جێگیر لە بنکەی حەوت تاش لە سنووری بڕوێشکانێ کوژرا.
قوربانییەكە خەڵکی گوندی قوڵیاوا-ی سەر بە شاری بانە-یە، باوکی دوو منداڵ بووە و خێزانەکەشی دووگیانە.
ڕێكخراوەكە ڕوونیكردووەتەوە، لەماوەی 35 ڕۆژی ڕابردوودا لانیکەم پێنج کۆڵبەر و کاسبکار لە سنووری بانە بە تەقەی ڕاستەوخۆی هێزە چەکدارەکانی کۆماری ئیسلامیی ئێران کوژراون.
