کەناڵی ئەلعەرەبییە لە زاری سەرچاوەیەکی عێراقییەوە ئاشکرایکردووە کە ئێوارەی ڕۆژی یەکشەممە ٢٩ی تشرینی دووەم سەرکردەیەکی سوپای پاسداران لەلایەن فڕۆکەی بێفڕۆکەوانی ئەمریکییەوە لە نێوان عێراق و سوریادا کراوەتە ئامانج.
بەپێی هەواڵەکە کاتێک “موسلم شهیدان” سەرکردە لە سوپای پاسداران ویستوویەتی لە ڕێگەی خاکی عێراقەوە بڕواتە خاکی سوریاوە لەلایەن سوپای ئەمریکاوە بە فڕۆکەی بێفڕۆکەوان بۆردوومانکراوە و کوژراوە.
بە پێی سەرچاوەی هەواڵەکە لەگەڵ ئەو سەرکردەیەی سوپای پاسداراندا سێ کەسی دیکە کە لە ئۆتۆمبیلێکدا بوون کوژراون.
کوژرانی ئەو سەرکردەیەی سوپای پاسداران لە کاتێکدایە کە ئێران هێشتا لە پرسەی موحسین فەخریزادە، سەرۆکی دامەزراوەی لێکۆڵینەوەی وزە لە سوپای پاسداراندایە و هەڕەشە دەکات کە بکەرانی هێرشی سەر فەخریزادە وەڵام وەردەگرن.
ئێوارەی ئەمڕۆ سوپای پاسداران لە بەیاننامەیەکدا وتی، “سات و شوێنی تۆڵەکردنەوەی موحسین فەخریزادە دیاری دەکەین و بەم نزیکانە تۆڵە دەکەینەوە”.
