ئاسایشی سلێمانی سكاڵا لەسەر پەرلەمانتارێكی نەوەی نوێ و پەیامنێرێكی NRT تۆماردەكات، بە تۆمەتی “ناڕەوا هەوڵی لەکەدارکردنی هێزەکانمان دەدەن و بوختان و ھەواڵی ناڕاست دادەتاشن” .
بەپێی ڕاگەیەندراوێكی ئاسایشی سلێمانی، “ئاسایشی سلێمانی وەک دەزگایەکی نیشتیمانیی بەرپرسیار پابەند بەیاسا بەرکارەکانی ھەرێم و پرنسیپه‌كانی ئازادی و مافه‌كانی مرۆڤ، کەرەکانی دەکات، بەڵام ئەوەی جێی داخە کەسانێک لەژێر چەتری هەندێک کۆمپانیاو لایەنی سیاسی یان پیشەی پیرۆزی ڕاگەیاندنکاریدا لێرەو لەوێ پشتیوانی تیرۆریستان و دوژمنانی ئەم گەلە دەکەن، بە تۆمەتی ناڕەوا هەوڵی لەکەدارکردنی هێزەکانمان دەدەن و بوختان و ھەواڵی ناڕاست دادەتاشن .”
باسی لەوەش كردووە، ھێزەکانیان ھەردەم ماندوونەناسانە لەهەوڵ و هیمەتی بەردەوامدان لەپێناو پارێزگاری لە سەروماڵی هاوڵاتییان، لەو پێناوەشدا درێغییان نەکردووە و نایکەین لە ڕووبەڕووبوونەوەی “دوژمنانی ئەم گەلە لە تیرۆریستان و یاسا شکێنان و ھەڵاتووان لە دادگا، کە ئەمە ئەرکی ئێمەیە و دڵسۆزانە ڕایدەپەڕێنین” .
لە بەشێكی دیكەی ڕاگەیەندراوەكەدا هاتووە، “بۆکۆمەڵانی خەڵکی کوردستانی ڕووندەکەینەوە بەھای هێزەکانی ئاسایش بەو جۆرە کەسە ئاست نزمانە لەکەدار نابێت کە بەبێ بەڵگە و زانیاریی دروست ژەھری پڕوپاگەندە بڵاودەکەنەوە کە بەمەرامەکانشیان ڕووی ناشرینی تیرۆریستان بە قسە و پشتیوانی ئەو جۆرە کەسانە ئارایشت نابێت “.
جەختیشی كردووەتەوە، “بۆھەموولایەکی ڕووندەکەینەوە لەبەرامبەر چەندینجار دووبارەبوونەوەی ئەم تۆمەت بەخشینەوانە و دانانی سنوورێک بۆ ئەو جۆرە کەسانە، وەک بەڕێوەبەرایەتیی ئاسایشی سلێمانی ڕێکار و سکاڵای یاسایی تۆمار دەکەین دژ بە هەریەک لە :
(محەمەد ئیسماعیل عومەر) کە لەژێرناوی کاری پەرلەمانیدا هەستاوە بە بەخشینەوەی تۆمەتی ناڕەوا بۆ هێزەکانی ئاسایش .
-کاروان محەمەد پەیامنێری کەناڵی NRT کە لە سۆشیال میدیادا بە ئاشکرا پشتیوانی خۆی بۆ تیرۆریستان راگەیاندووە !
ئاسایشی سلێمانی دەشڵێت، “لێرەوە دووپاتیدەکەینەوە ئێمە وەک بەڕێوەبەرایەتیی ئاسایشی سلێمانی سەرەڕای بانگەشەی لە یاسا دەرچووان و هەوڵی نەزۆکی تیرۆریستان بەردەوام بەپاڵپشتی یاسا و دەسەڵاتی دادوەری بە پشیوانی خوا و خەڵکی کوردستان لە خەمی پاراستنی سەروماڵی ھاوڵاتییاندا دەبین و لە پێناو سەقامگیری و ئارامی ھەرێم شەونخونی دەکەین”.
