بۆکسێنەری بەریتانی، تایسن فیوری حەوت ڕۆژ مۆڵەتی بە ئۆلیکساندەر یوسیکی ئۆکرانی دا تاوەکو بڕی پێویست کۆبکاتەوە و بڕیارە لە ڕووبەڕووبوونەوەی بدات.
یوسیک لە یاریی “ڕیماچ” بردنەوەی بەرامبەر ئانتۆنی جۆشوای بەریتانی بەدەستهێنا و پارێزگاری لە پشتێنەکانی پاڵەوانی جیهان کرد، دوای یارییەکەش پەیامێکی ئاراستەی تایسن فیوری کرد کە بە “جیپسی کینگ” ناسراوە.
پاڵەوانە ئۆکرانییەکە داوای لە فیوری کرد، لە بڕیاری وازهێنان پاشگەز ببێتەوە و یارییەکی بۆکسێنی بەرامبەر بکات.
لە وەڵامی ئەو بانگهێشتنامەیەدا، فیوریی ناسراو بە “جیپسی کینگ” لە تۆڕی کۆمەڵایەتی ئینستاگرامەوە پۆستێکی کردووە و نووسیویەتی، “حەوت ڕۆژ مۆڵەتت پێدەدەم 500 ملیۆن دۆلار کۆبکەیتەوە بۆ ڕووبەڕووبوونەوەم، یان ڕازی بە، یان هەوڵی دیکە مەدە.”
زۆرینەی شارەزایانی بواری بۆکسێن پێیان وایە، یاریی نێوان فیوری و یوسیک دەبێتە یەکێک لە بەهێزترینەکانی بواری بۆکسێن، چونکە سەرجەم پشتێنەکان تیایدا یەکلایی دەکرێتەوە.
