سەرۆكی یەكێتی لەگەڵ سەرۆکی ھاوپەیمانیی دەوڵەتی یاسا لە بەغداد كۆبووەوە.
بافڵ جەلال تاڵەبانی، سەرۆکی یەکێتیی نیشتمانیی کوردستان و نوری مالکی سەرۆکی ھاوپەیمانیی دەوڵەتی یاسا لە بەغداد كۆبوونەوە.
لە دیدارێكدا دوایین گۆڕانكارییە سیاسییەكان و هەوڵەكان بۆ دروستبوونی كۆدەنگی نیشتمانی تاوتوێكران و جەخت لە سازان لەسەر بنەمای هاوبەشیی ڕاستەقینە كرایەوە تاوەكو عێراق لەو دۆخە سیاسییەی تێیكەوتووە دەربازبكرێت.
ھەر لە دیدارەکە پێشوازی لە دەستپێشخەرییەكەی ئەمڕۆ كرا بۆ كۆكردنەوەی هێز و لایەنە جیاوازەكان بۆ دۆزینەوەی ڕێگاچارەیەكی گونجاو و زاڵبوون بەسەر ئاڵنگارییەكان، داواشكرا هەنگاوەكانی سەرخستنی ئەم دەستپێشخەرییە بەردەوام و خێراتر بكرێت و هەوڵەكان لە خزمەت ئامانجە باڵاكاندا بێت.
بافڵ جەلال تاڵەبانی لە دیدارەکەدا پەرۆشیی یەکێتی بۆ گەیشتن بە ڕێککەوتنی نیشتمانیی دووپاتکردەوە و ڕایگەیاند، دۆخی ئەمڕۆی وڵات وا دەخوازێت كە هەموومان لەپێناو سەقامگیری و حوكمڕانییەكی باشتر یەكدەنگ بین و ئامانجمان بەدیهێنانی ژیانێكی ئارام و خۆشگوزەران بێت بۆ هاوڵاتییان.
