بەرەبەیانی ئەمڕۆ یەکشەممە بزوتنەوەی جیهادی فەڵەستینی کوژرانی یەکێک لە گەورە سەرکردە سەربازییەکانی بزوتنەوەکەی لە هێرشەکانی ئیسرائیلدا بۆ سەر کەرتی غەززە ڕاگەیاند.
لە ڕاگەیەندراوێکدا بزوتنەوەکە ئاشکرایکردووە، “سەرایا قودس فەرماندەی گەورە خالید سەعید مەنسووری لەدەستدا، کە ئەندامی ئەنجومەنی سەربازی و فەرماندەی ناوچەی باشوور بووە و لە هێرشێکی ئیسرائیلدا شەوی ڕابردوو لە شاری ڕەفەح گیانیلەدەستدا”.
سەرچاوەکان باس لەوە دەکەن، لەو هێرشەدا کە مەنسووری کردووەتە ئامانج 40 کەسی دیکە برینداربوون.
ڕۆژی هەینیی ڕابردوو گرتە ڤیدیۆیەک بڵاوبووەوە کە ئیسرائیل شوێنی نیشتەجێبوونی تەیسیر جەعبەریی سەرکردەی باڵی سەربازیی بزوتنەوەی جیهادی لە ناوچەی باکوور کردووەتە ئامانج.
بەیانیی ئەمڕۆ وەزارەتی تەندروستیی فەڵەستین ئاشکرایکرد، ژمارەی ئەوانەی بەهۆی هێرشەکانی ئیسرائیلەوە گیانیان لەدەستداوە گەیشتووەتە 32 کوژراو کە شەشیان منداڵن، هەروەها ژمارەی بریندارەکانیش 215 بریندارن.
