ئیدارەی یانەی مانچستەر یونایتدی ئینگلیزی توڕەیی خۆی بەرامبەر ئەو هەڵسوكەوتەی ڕۆناڵدۆ دەڕبڕی كە لە یارییەكەی ڕایۆڤالیكانۆ ئەنجامیدا.
مانچستەر یونایتد یارییەكی دۆستانەی لە ئۆڵدترافۆرد بەرامبەر ڕایۆڤالیكانۆ ئەنجامدا و هەردولا بە گۆڵێك یەكسانبوون.
ڕۆناڵدۆ لەو یارییەدا یەك تایم بەشداریكرد و دواتر كە دانیشێندرا، دەستبەجێ یاریگای جێهێشت و چاوەڕێی تەواو بوونی یارییەكەی نەكرد.
هەرچەندە باس لەوە كرا كە ڕۆیشتنەكەی بە پرسی تین هاگی ڕاهێنەر بووە، بەڵام ئیدارەی مانچستەر لە هەڵسوكەوتی یاریزانەكە ڕازی نین و گلەیی خۆیان گەیاندۆتە لای.
ئەوان پێیانوایە ڕۆناڵدۆ بێڕێزی كردووە بەرامبەر ڕاهێنەر و یاریزانەكانی هاوڕێی و دەبوو لەگەڵ ئەواندا یاریگا جێبهێڵێت.
هەروەها لەدەرەوەی یاریگاش وەك پێویست بەدەم هاندەرانەوە نەچووە و كاردانەوەی نەبووە بۆیان.
ڕۆناڵدۆ لە سەرەتای وەرزەوە بەشداری دوو ئامادەكاری مانچستەری نەكرد لە تایلەند و ئوسترالیا ، هەندێك دەڵێن كێشەی تایبەتی هەیە و هەندێكیش دەڵێت بەدوای یانەیەكی نوێ دەگەڕێت تا یاریی تێدابكات و نایەوێت لە ڕكابەرییەكانی چامپیۆنز لیگ داببڕێت.
