بەهۆی خواردنەوەی كحولی ساختەوە، 28 كەس لە هیندستان گیانیان لەدەستدا، 60 كەسی تریش نەخۆشكەوتوون و لە ژێر چارەسەر و چاودێریی پزیشكیدان.
مردنەكان لە هەردوو ناوچەی ئەحمەد ئاباد و بوتاد لە ویلایەتی گوجارات تۆماركراون، كە ناوچەیەكە دروستكردن، فرۆشتن و خواردنەوەی مەی تیایدا قەدەغەكراوە.
میدیای هیندستان ڕایگەیاند، خواردنەوە كحولییەكان كە بوونەتەهۆی مردنی 28 كەس و تێكچوونی تەندروستیی زیاتر لە 60 كەسی تر، ساختەبوون و بە ڕێگەی نائاسایی بەرهەمهێنراون، بەڵام هێشتا ئاشكرانەبووە چ ماددەیەكی كیمیاییان تێكراوە.
بەپێی ڕاپۆرتەكان مردن بەهۆی مەیی ساختەوە لە هیندستان بووەتە دیاردە. ئاژانسی ئەسۆشییەیتد پرێس دەڵێت، ئەو خواردنەوە كحولییانە هەرزانن؛ چونكە ساختەن و دەرمانی مێرووكوژ و كیمیایی دەكرێتە پێكهاتەیانەوە.
لە كاردانەوەی مردن و نەخۆشكەوتنی ئەو دەیان كەسەدا، پۆلیسی هیندستان ژمارەیەك قاچاخچیی خواردنەوە كحولییەكانی دەستگیركردووە و بە میدیای وڵاتەكەی ڕاگەیاندووە، گوماندەكرێت قاچاخچییە دەستگیركراوەكان دەستیان هەبووبێت لە فرۆشتنی ئەو مەیە ساختانەدا.
