نێچيرڤان بارزانى، سه‌رۆكى هه‌رێمى كوردستان پەیامێكی لەبارەی هێرشەكانی شەوی ڕابردووی داعش بڵاوكردەوە و بە “مه‌ترسييه‌كى جددی” ناویاندەبات و داوای هاریكاریی زیاتری نێوان سوپا و هێزه چه‌كداره‌كان و پێشمه‌رگه دەكات.
دوێنێ یەكشەممە، داعش زنجيره‌یەك هێرشی بۆ سه‌ر هێزه چه‌كداره‌كان لە به‌غداد، دياله، سەڵاحه‌دين و كه‌ركوک ئەنجامدا. لە پەیامەكەیدا سەرۆكی هەرێم ئەو هێرشانە بە مەترسیی جددی ناودەبات و دەڵێت، “جموجۆڵ و به‌هێزبوونه‌وه‌ى داعش و فراوانبوونى هێرش و په‌لاماره‌كانى، هه‌ڕه‌شه‌ى ڕاسته‌قينه له ئاسايش و سه‌قامگيريى ته‌واوى عێراق ده‌كه‌ن كه پێويسته به جددى هه‌ڵوێسته‌ى له‌سه‌ر بكرێت و وه‌ڵامى يه‌كلاكه‌ره‌وه‌ى بدرێته‌وه”.
نێچيرڤان بارزانى جەختدەكاتەوە كە “بۆ به‌ره‌نگاربوونه‌وه‌ى ئه‌و هه‌ڕه‌شانه‌ى داعش، پێويسته هاريكارى و هاوئاهەنگیی كاراتر له‌نێوان سوپا و هێزه چه‌كداره‌كان و پێشمه‌رگه و ده‌زگا ئه‌منييه‌كانى عێراق و هه‌رێمى كوردستاندا بكرێت. هه‌روه‌ها پێويسته پشتگيريى هاوپه‌يمانيى نێوده‌وڵه‌تيى دژى داعش بۆ عێراق و هه‌رێمى كوردستان به‌رده‌وام بێت”.
پەیامەكەی سەرۆكی هەرێم ڕایگەیاندووە، “بارودۆخى ئه‌منى و سياسيى عێراق، هاريكارى و كارى هاوبه‌ش و پێكه‌وه‌يى له ته‌واوى هێز و لايه‌نه عێراقييه‌كان ده‌خوازێت بۆ ئه‌وه‌ى هه‌مووان پێكه‌وه سه‌ختييه‌كان تێپه‌ڕێنن و چيتر دۆخى ئاڵۆزيى سياسى نه‌بێته هۆكارى تێكچوونى ئاسايش و سه‌قامگيرى و به‌هێزبوونه‌وه‌ى زياترى داعش”.
