كریستیانۆ ڕۆناڵدۆی پورتوگالی لە لیشبۆنە كاتەكانی بەسەر دەبات و چاوەڕێی ئەوە دەكات خۆرخی میندێزی بەڕێوەبەری كارەكانی، داهاتووی بۆ یەكلایی بكاتەوە.
ڕۆژانە كریستیانۆ ڕۆناڵدۆ لە ماڵەكەی خۆی لە لیشبۆنە لەكاتژمێر 9ی بەیانییەوە ڕاهێنانەكانی دەستپێدەكات و پێنج و شەشی ئێوارە دەست هەڵدەگرێت.
بڕیاری كۆتایی ڕۆناڵدۆ ئەوەیە نەگەڕێتەوە بۆ مانچستەر یونایتد و نایەوێت بە هیچ شێوەیەك لە چامپیۆنز لیگ داببڕێت.
چاوەڕێش دەكات میندێزی بەڕێوەبەری كارەكانی، یانەیەكی بەهێزی بۆ بدۆزێتەوە كە ڕكابەری چامپیۆنز لیگ بكات.
تا ئێستا ڕۆناڵدۆ لە هەردوو یانەی بایرن میونشن و ڕیاڵ مەدرید بێ هیوا بووە و دەنگۆی ئەوە هەیە كە ئەتلەتیكۆمەدرید لە ڕكابەرییەكە بێتە پێشەوە.
بازاڕی گواستنەوەی یاریزانان 31ی مانگی هەشت دادەخرێت و هێشتا كاتی تەواو لەبەردەم ڕۆناڵدۆدا هەیە بۆ ئەوەی داهاتووی خۆی یەكلایی بكاتەوە.
ڕۆناڵدۆ ئێستا تەنها یەك گرێبەست لەبەردەستییەتی ئەویش گرێبەستی یانەیەكی سعودییە و ڕاستەوخۆ ڕەتكرایەوە.
جگە لەو گریبەستە هیچ گرێبەستێك لە یانەیەكی گەورەی ئەوروپاوە نەهاتۆتە بەردەست ڕۆناڵدۆ.
