مەكتەبی سیاسیی یەكێتی بە سەرۆكایەتی بافڵ جەلال تاڵەبانی كۆبووەوە و پێداگری لەسەر ئیستیحقاقی سەرۆک کۆمار و کاندیدی پەسەندکراوی خۆی بۆ ئەو پۆستە دووپاتکردەوە.
ئەمڕۆ 8ی تەمموز مەکتەبی سیاسی بە سەرۆکایەتیی بافڵ جەلال تاڵەبانی سەرۆکی یەکێتیی نیشتمانیی کوردستان لە دەباشان کۆبوونەوەی ئاسایی خۆی ئەنجامدا.
بەپێی ڕاگەیەندراوێكی كۆبوونەوەكە، لە سەرەتادا سەرۆکی یەکێتی کورتەیەکی لەسەر دواهەنگاوەکانی وەفدی دانوستانی یەکێتی لە بەغداد لەگەڵ لایەنە سیاسییەکانی عێراق، باڵیۆز و نوێنەرایەتی وڵاتان پێشکەشکرد و ئاماژەی بەوەدا، هەموو لایەنەکان لەسەر سیاسەتی ڕاست و دروستی یەکێتی کۆکن کە بەشێوەیەکی ڕاستەوخۆ داکۆکی لە پرەنسیپەکانی سازان، هاوسەنگی و شەراکەت دەکات و ئەم پرەنسیپانەش درێژەدانە بە هەمان سیاسەتی سەرۆک مام جەلال لە سەردەمی زێڕینی ڕۆڵی کورد لە بەغداد.
کۆبوونەوەی مەکتەبی سیاسیی یەكێتی هەڵوەستەی لە ئاستی ڕەوشی دیالۆگی یەکێتی و هێز و لایەنە عیراقییەکان کرد کە بەهۆی یەکڕیزی، یەکئاڕاستەیی و یەکدەنگی حزبییەوە ئەمڕۆ بە سەربەرزییەوە ماڵی سەرۆک مام جەلال لە بەغداد بووەتە شوێنی پێکگەیشتنی ئاڕاستە، دید و بۆچوونە جیاوازەکان و دیدارەکانی بافڵ جەلال تاڵەبانی درێژەی هەمان کەلتووری سەنگینی سەرۆک مام جەلالە بۆ دروستکردنی ڕایەڵەی پەیوەندی نێوان پێکھاتەکان و پاراستنی ئیستحاقە دەستورییەکانی گەلەکەمان لە عێراقی نوێ، وەك ئەوەی لە ڕاگەیەندراوەكەدا هاتووە.
ڕاشیگەیاند، گفتوگۆ لەسەر دۆخی ژیان و گوزەرانی هاوڵاتییانی هەرێمی کوردستان و عێراق کرا و لەمبارەیەوە وێڕای پشتیوانی لە چاکسازییە حزبی و حکومییەکان و پشتیوانی لە حکومەتی ھەرێمی کوردستان و تیمی یەکێتی لە حکومەت، تەئکیدکرایەوە کە پێکهێنانی حکومەتی داهاتووی عێراق و سەنگی سیاسەتی یەکێتی لە پایتەختی فیدراڵی ڕێ بۆ باشترکردنی ژیان و گوزەرانی خەڵکی هەرێمی کوردستان خۆشتر دەکات بەوپێیەی هاوکات لەگەڵ پەرەپێدانی پەیوەندییەکانی هەرێم و بەغداد دۆسییەكانی وەک بودجە، مووچە و شایستەکانی دیكە گەلەکەمان لە دۆخی کەرکوک و ناوچە دابڕاوەکان کە بەشێکی دانەبڕاوی سیاسەتی یەکێتییە، بەرەو چارەسەر ھەنگاو دەنێت.
لە کۆتاییشدا مەکتەبی سیاسی “پێداگری یەکێتی لە ئیستیحقاقی سەرۆک کۆمار و کاندیدی پەسەندکراوی خۆی بۆ ئەو پۆستە دووپاتکردەوە و تەئکیدیشی لەسەر پێویستی پێکهێنانی حکومەتێکی هاوسەنگ، تەوافوق و خزمەتگوزار کردەوە کە مەبەستی سەرەکی لە پێکهێنانی ئەو حکومەتەش خزمەتکردنی هاوڵاتییان و باشترکردنی ژیان و گوزەرانیان بێت”.
