بەڕێوەبەرایەتیی گشتیی تەندروستیی سلێمانی چەند ڕێنماییەكی بۆ پاراستنی تەندروستیی هاوڵاتییان لە تای خوێنبەربوون بڵاوكردەوە كە پێوستە لەكاتی سەربڕینی ئاژەڵ بۆ قوربانی ئەم ڕێنماییە زانستییانە جێبەجێبكرێن كە بریتین لە:-
1. سەربڕینی ئاژەڵ پێویستە لەناو ئەو سەربڕینخانانەدا بێت كە ڕێگاپێدراون و پزیشكی ڤێتێرنەريی سەرپەرشتییان دەكات.
2. لەكاتی سەربڕینی ئاژەڵ و كەوڵكردن و پارچە پارچەكردنی گۆشتەكەیدا پۆشینی جل و بەرگی خۆپارێزی وەكو (دەستكێش، جزمە ،سەدریەی پلاستیك ، ماسكی دەمو چاو) لەبەركرێن.
3. نابێت خانەوادە یاخود خەڵك لە دەوری سەربڕەكە (قەساب) كۆ ببنەوە و نابێت هاوكاری بكەن لەكاتی سەربڕینی ئاژەڵ و پارچە پارچە كردنی گۆشتەكەدا.
4. بەبێ دەستكێش مامەڵەكردن لەگەڵ ئاژەڵی سەربڕاو مەكەن و دوای پۆشینی دەستكێش و كەلوپەلی خۆپارێزیی گۆشتەكە پارچە پارچە بكرێت و دواتر دەست بشۆردرێت.
5. لابردنی پاشماوەی ئاژەڵە سەربڕاوەكان و دانانی كیسی داخراو و فڕێدانی بۆ شوێنی تایبەت.
6. بەكارهێنانی چەقۆ و تەختەی پارچە پارچەكردنی تایبەت بە گۆشت و شتن وخاوێنكردنەوەی تەختە و چەقۆكان دوای بەكارهێنانيان.
7. پاككردنەوەی ئەو شوێنەی ئاژەڵەكەی لێسەردەبڕێت و بەتایبەت ئەو شوێنانەی خوێنی لێیە بە ماددەی كلۆریین (بلیچ- موعجیزە).
8. باشتر وایە گۆشت دوای سەربڕینی ئاژەڵ بۆماوەی نیو كاتژمێر لە پلەی (٤ – ٨ )پلەی سەدی هەڵبگیرێت و دواتر بەكاربهێنریت، بەڵام گۆشتی كوڵاو هیچ گرفتێكی نییە سەلامەتە و نابێتە هۆی تووشبوون بە تای خوێنبەربوون.
9.ئەگەر ئاژەڵ گەنە یان مێرووی تری هەبوو باشتر وایە نەیكڕیت یان سەرینەبڕێت بۆ دووربوون لە نەخۆشی تای خوینبەرببوون. ئەم نەخۆشییە لەنێوان ئاژەڵەكان دەگوازرێتەوە و بۆ مرۆڤیش، بەهۆی گەنە و مێرووەكانی كەلەسەر ئاژەڵەكان دەژین وەبەهۆی خوێن و گۆشتی ئاژەڵەكەوە دەگوازرێنەوە.
