ماوەی چوار مانگە پڕۆژەی ڕێگای دووسایدی کەلار – دەربەندیخان بەهۆی خەرجنەكردنی بودجەوە كارەكانی ڕاگیراون، بەڵام حكومەت دەڵێت، پارەی بۆ خەرجكراوە و كاركردن تیایدا بەردەوامە.
فەرمانگەی میدیا و زانیاریی حكومەتی هەرێمی كوردستان، ئەمڕۆ پێنجشەممە ڕایگەیاند، “ڕۆژانە 130 ئامێر بە درێژایی 12 کاتژمێر لە پڕۆژەی ڕێگای دووسایدی کەلار – دەربەندیخان کاردەکەن”.
فەرمانگەكە دەڵێت، “دوای وەستانی پڕۆژەکە بەهۆی قەیرانی دارایی، لە سەرەتای مانگی حوزەیران و بە ڕەزامەندیی مەسرور بارزانی سەرۆکی حکومەتی هەرێمی کوردستان، 60 ملیار دینار لە چێوەی گوژمەی پڕۆژەکە بۆ تەواوکردنی ڕێگاکە تەرخانکرا”.
بڵاوكردنەوەی ئەو هەواڵە لە كاتێكدایە، ماوەی چوار مانگە پڕۆژەكە ڕاگیراوە و پارەی بۆ خەرجناكرێت. خەرجكردنی ئەو پارەیەش كە فەرمانگەی میدیا و زانیاری باسیدەكات، ماوەی دوو هەفتەیە بڕیاری لێدراوە، بەڵام تا ئێستا خەرجنەكراوە.
بەپێی فەرمانگەی میدیا و زانیاری، لەسەر داهاتی وەزارەتی ئاوەدانکردنەوە 60 ملیار دینار بۆ پڕۆژەكە خەرجدەكرێت، لە کاتێکدا دەبێت ئەو پارەیە لە داهاتی پارێزگای سلێمانی خەرجبكرێت.
