موقتەدا سەدر ڕێبەری ڕەوتی سەدر، ئەنجومەنێكی شەش كەسیی بۆ سەرپەرشتیكردن و بەڕێوەبردنی كاروباری دامەزراوەكانی ڕەوتەكەی پێكهێنا.
لە چەند ڕۆژی ڕابردوودا هاوكاتی كشاندنەوەی پەرلەمانتارەكانی لە ئەنجومەنی نوێنەران، سەدر كاری بەشێك لە دامەزراوەكانی سەر بە ڕەوتەكەی هەڵپەسارد و تەنها شەش دامەزراوەی بە كارایی هێشتەوە.
ئەمڕۆ پێنجشەممە لە نووسراوێكدا سەدر ئاشكرایكرد، شەش كەسی ڕاسپاردووە بۆ سەرپەرشتیكردن و بەڕێوەبردنی ئەو شەش دامەزراوەیە كە بریتین لە نووسینگە تایبەتەكەی و چەند دامەزراوەیەكی ئایینی و كەلەپووری.
ئەوانەی موقتەدا سەدر ڕایسپاردوون بۆ بەڕێوەبردنی دامەزراوەكانی ڕەوتی سەدر، پێكهاتوون لە عەلی سەدر، مستەفا یەعقوبی، حەلیم فەتلاوی، مەحموود جەیاشی، حەیدەر جابری و محەمەد عبودی.
