ئەندامێكی ئەجومەنی نوێنەرانی عێراق ڕایدەگەیەنێت، حكومەت داهاتی سندوقی كۆمەكی شێرپەنجەی خەرجكردووە و شەش مانگە پارەی پزیشك و كارمەندانی نەخۆشخانەی هیوای نەداوە.
سۆران عومەر ئەندامی ئەنجومەنی نوێنەرانی عێراق ڕایگەیاند، سندوقی كۆمەكی تووشبووانی شێرپەنجە كە بەیاسا دانراوە حكومەت بۆی نییە دەستكاری داهاتەكەی بكات، بەڵام پارەی تێدا نەهێڵدراوە، لە گومرگ و باج و ڕسووماتی جگەرە و مەشروب و هاتوچۆش هیچ بڕە پارەیەك ناخرێتە سندوقەكە كە بەیاسا بۆی تەرخانكراوە.
ئاماژەی بەوەشكرد، “پێویستە لەداهاتی سلێمانی دەرمانی چارەسەری شێرپەنجە بۆ هیوا بكڕدرێت و هیچ چەكێكی دەرمانی هیوا لە هەولێر خەرجناكرێت و سلێمانیش دەڵێت بانك پارەی تێدا نییە”.
ئاشكرایكرد، بۆ ئەوەی پزیشكێك نۆرینگەی ئەهلی دانەنێت و لە نەخۆشخانی ئەهلی دەوامنەكات دواتر لەنەخۆشخانەی هیوا دەوامدەكات و چارەسەری نەخۆش دەكات، بەڵام شەش مانگەپارەی ئەو پزیشك و كارمەندانەش نەداوە.
