خۆبەخشان و دانەمەزراوانی بەشە پزیشكییەكانی سلێمانی داوای دەستلەكاركیشانەوەی وەزیری تەندروستیی هەرێم دەكەن.
لە ڕاگەیەنراوێكدا خۆبەخشان و دانەمەزراوانی بەشە پزیشكییەكانی سلێمانی ئاماژەیان بەوە كردووە، لەدوای ئامادەبوونی د.سامان بەرزنجی وەزیری تەندروستی لە كۆبوونەوەكەی دوێنێی پەرلەماندا، تەنها 40 چركە باسی لە دەرچووە دانەمەزراوەكان كرد و خۆبەخشان و دانەمەزراوانی بەشە پزیشكییەكانی سلێمانی داوای دەستلەكاركیشانەوەی سامان بەرزنجی، وەزیری تەندروستی هەرێم دەكەن.
ڕاشیانگەیاندووە، “چاوەڕوان بووین وەزیری تەندروستی ڕوونكردنەوە و داوای لێبوردنی هەبێت لەو نادادپەروەرییەی لە سنووری سلێمانی كراوە و گرێبەستیان بۆ شوێنەكانی دیكە كردووە و سلێمانی بێبەشكراوە و چاوەڕێ بووین وەڵامدانەوەی هەبێت بۆ هەفتەیەك خۆپیشاندان و مانەوەمان لەسەر شەقام، بەڵام لەقسەكانیدا بۆمان دەركەوت ئەم كەسە بەهیچ شێوەیەك هەست بەبەرپرسیارێتی ناكات و توانای نییە وەزارەتێكی گرنگی وەكو وەزارەتی تەندروستی بەڕێوەببات و بۆیە داوای دەستلەكاركێشانەوە لەجەنابیان دەكەین”.
لە ڕاگەیەندراوەكە هاتووە، 77 پەرلەمانتار256 پرسیاریان لەوەزیر كردووە هیچیان ئاماژەیان بەكێشە سەرەكییەكە و گرنگەكە نەكردووە، دەڵێن، “با دەرمان هەبێت با بینا هەبێت كە كارمەند نەبێت خزمەتی نەخۆش بكات بەچی دەچێت، بۆیە گلەییمان لەسەرجەم پەرلەمانتاران هەیە كە نەیانتوانیووە نوێنەرایەتیی ئێمە بكەن و كێشەكانی ئێمە بخەنەڕوو”.
