لە دوایین ڕۆژانی تاقیكردنەوەكانی كۆتایی ساڵدا، تێزاب دەكرێت بە ئۆتۆمبێلی چوار مامۆستادا.
بەڕێوەبەرایەتیی پۆلیسی موسڵ ئاشكرایكرد، چوار ئۆتۆمبێل كە خاوەنەكانیان مامۆستا، بەڕێوەبەری هۆڵی تاقیكردنەوە و سەرپەرشتیاری پەروەردەیین، تێزابیان پێداكراوە و زیانیان پێگەیشتووە.
بەپێی سەرچاوەكە، شوێنی ڕووداوەكە بەردەم هۆڵێكی تاقیكردنەوە بووە و ئۆتۆمبێلەكان لەبەردەم خوێندنگەی عەمرو بنلعاس لە گەڕەكی قودس-ی موسڵ ڕاگیرابوون، كاتێك مامۆستاكان لە هۆڵی تاقیكردنەوە چوونەتە دەرەوە و دیمەنەكەیان بینیوە، سكاڵایان لای پۆلیس تۆماركردووە و بكەرانیان بە تێكدەر ناوبردووە و داوای دەستگیركردنیان و وەرگرتنەوەی مافەكانیان دەكەن.
پێشتر خوێندكارێك لە بەغداد دوای دەرچوونی سەرپەرشتیارێكی پەروەردەیی لە هۆڵی تاقیكردنەوە، هێرشیكردبووەسەری و برینداری كردبوو. ئەوەش وەزیری پەروەردەی عێراقی تووڕەكردووە و داوای پاراستنی مامۆستایان و ستافی پەروەردە دەكات.
