وەزیری بازرگانيی هەرێم ڕایدەگەیەنێت، بڕیاریانداوە بە پێکهێنانی لیژنەیەکی بەدواداچون و لێکۆڵینەوە بۆ ئەوەی بگەن بە ڕاستی ئەو بابەتەی کە پەیوەندی هەیە بە کەمتەرخەمی لە دابەشکردنی بەشەخۆراکی مانگانە بەسەر هاوڵاتییاندا.
کەمال موسلیم، وەزیری بازرگانی و پیشەسازیی هەرێم سەردانی کۆگاکانی سلێمانی کرد و لە کۆنگرەیەکی ڕۆژنامەوانیدا ڕایگەیاند، تەواوی گیروگرفتەکان لەگەڵ فەرمانبەرانی کۆگاکاندا باسکران و لیژنەکەیەکی لێکۆڵینەوەش لەسەر ئەو بابەتە پێکهاتووە.
باسی لەوەشكرد، ئەگەر گۆڕانکاری لە ماددە خۆراکییەکان کرابێت تاوانە و ئەگەر کەسێکیش بەڵگەی لایە با بیخاتەڕو ئێمەش بەدواداچونی بۆ دەکەین، بەڵام باوەڕناکەم شتی وا کرابێت.
وەزیری بازرگانی ئەوەشیخستەڕوو، ئەوەی مووچەكەی لە یەك ملیۆن و 500 هەزار دینار زیاتربێت بەشەخۆراكی مانگانەی دەبڕدرێت.
