لێدوانێكی سەرۆكی پێشووتری ئەمریكا كاردانەوەی زۆری لە تۆڕە كۆمەڵایەتییەكاندا بەدوای خۆیدا هێنا پاش هەڵەیەكی ناوبردن دەربارەی شەڕی ڕوسیا بۆسەر ئۆكرانیا.
جۆرج بوش-ی كوڕ لە وتەیەكیدا لە “پەیمانگای بوش” كە دوێنێ چوارشەممە پێشكەشیكرد ڕایگەیاند، سیستمی هەڵبژاردن لە ڕوسیا بووەتەهۆی بارگرژی لە ئۆكرانیا و وتی، “هەڵبژاردنی ڕوسیا ساختەیە.. ئەنجامەكەی نائامادەیی لێپرسینەوەیە لە ڕوسیا و بڕیاری تاكە كەسێك بۆ ئەنجامدانی داگیركاریی بێبیانوو و بێبەزەییانەی عێراق… مەبەستم ئۆكرانیایە..”.
بوش لەنێوەندی پێكەنینی ئامادەبوواندا وتیشی “عێراقیش بەهەمان شێوە”، بۆ خۆدەربازكردنیشی لەو هەڵوێستەی تێیكەوت وتی، “من تەمەنم 75 ساڵە”.
Former U.S. President George W. Bush: “The decision of one man to launch a wholly unjustified and brutal invasion of Iraq. I mean, of the Ukraine” pic.twitter.com/IanADTcAg6
— BNO News (@BNONews) May 19, 2022
لە وەڵامدانەوەی هەڵە زمانەوانییەكەی بوش، كەناڵی (سی ئین ئێن) ئاماژەی بەو بروسكەیە كرد كە پێشتر ئاژانسی هەواڵگریی ناوەندیی ئەمریكا بڵاویكردەوە و تیایدا گومانی زیاتر دەخاتەسەر بیانووەكانی پێشووی ئیدارەی بوش بۆ هێرشكردنەسەر عێراق لە ساڵی 2003دا.
بروسكەكە ئەو زانیارییانەی ڕەتكردەوە كە دەیوت محەمەد عەتا-ی یەكێك لە پلانداڕێژەرانی هێرشەكانی 11ی سێپتەمبەر لە چیك چاوی بە بەرپرسێكی عێراقی كەوتووە، بە چەند مانگێكی كەمی پێش هێرشەكان.
ئیدارەی بوش پێشتر ڕایگەیاندبوو كە عەتا چاوی بە بەكرێگیراوێكی عێراقی بەناوی ئەحمەد عنیان لە پراگ كەوتووە لە نیسانی 2001، ڕاپۆرتەكە تایبەت بوو بە پەیوەندی نێوان عێراق و هێرشەكانی 11ی سێپتەمبەر.
