کەشناسیی سلێمانی ئاشکرایکرد، خۆڵبارین ئەمڕۆ بە چڕی بەردەوام دەبێت و لە سبەینێوە کەمدەبێتەوە، لەکاتێکدا تەنها لە چوار مانگی یەکەمی ئەمساڵدا 23 حاڵەتی خۆڵبارین تۆمارکراوە.
ئاسۆ کەمال بەڕێوەبەری گشتیی کەشناسیی سلێمانی بە تۆڕی میدیایی ئێستای ڕاگەیاند، ئەو خۆڵبارینەی هەرێمی کوردستانی گرتووەتەوە ئەمڕۆ بەچڕی بەردەوام دەبێت و سبەینێ کاریگەرییەکەی کەمدەبێتەوە.
بەپێی داتاکانی کەشناسی لە مانگی کانونی دووەمی ئەمساڵەوە تا سەرەتای مانگی ئایار 23 حاڵەتی خۆڵبارین تۆمارکراوە، لەکاتێکدا لە سەرتاسەری ساڵی 2019دا تەنها دوو حاڵەتی خۆڵبارین هەبووە.
هۆکاری زۆریی خۆڵبارین لەمساڵدا بۆ کەمبارانیی دوو ساڵ لەسەریەک دەگەڕێتەوە، ئەوەش وشکبوونەوە و چالاکیی دیاردەی خۆڵبارینی لێکەوتووەتەوە.
