ئیسماعیل قائانی، فەرماندەی فەیلەقی قودسی سوپای پاسدارانی ئێران بەڵێندەدات فەڵەستین ڕزگاربكەن و دەڵێت، هێزەكانی بەرگری ویستیان لە خومەینییەوە وەرگرتووە.
ئیسماعیل قائانی، فەرماندەی فەیلەقی قودسی سوپای پاسدارانی ئێران ئەمڕۆ هەینی بەبۆنەی “ڕۆژی قودس”ـەوە وتەیەكی پێشكەشكرد و ڕایگەیاند، “هێزەكانی بەرگری بە توانای كەم و سنووردارەوە ڕووبەڕووی ئیسرائیل بوونەتەوە، بەڵام پشتئەستوورن بە هێزی باوەڕۆ و ئەو ویستەی ڕابەر خومەینی بۆی دیاریكردوون”.
قائانی لە وتەكەیدا بەڵێنی بە عەلی خامنەیی ڕابەری باڵای شۆڕشی ئیسلامیی ئێران دا “فەڵەستین ڕزگاربكەن” و وتی، “ئاهەنگگێڕان بەبۆنەی ڕۆژی قودسەوە، ڕێگەخۆشكەرە بۆ ڕزگاركردنی فەڵەستین”.
فەرماندەی فەیلەقی قودسی سوپای پاسدارانی ئێران، ڕووی وتەكانی لە كاربەدەستانی ئیسرائیل كرد و ڕایگەیاند، “دوو فڕۆكەی بێفڕۆكەوانی ئێرانیمان ناردە ئاسمانی فەڵەستین، ئێوە 41 فڕۆكەی شەڕكەر و چاودێرییتان فڕاند بۆ ڕووبەڕووبوونەوەیان، بۆچی درۆدەكەن؟!، ئێوە ناتانەوێ ڕاستییەكان ئاشكراببن”.
