ڕووداوی سووتانی تانكەرێكی گواستنەوەی سووتەمەنی و چەند ئۆتۆمبێلێك لەبەردەم تونێلی دەربەندیخاندا چوار برینداری لێكەوتەوە.
سامان شێخ لەتیف وتەبێژی تەندروستیی سلێمانی بە تۆڕی میدیایی ئێستای ڕاگەیاند، ئەو ڕووداوەی لەبەردەم تونێلی دەربەندیخاندا ڕوویدا و تانكەرێكی گواستنەوەی سووتەمەنی و چەند ئۆتۆمبێلێك سووتان، ژمارەی بریندارەكانی چوار كەسن.
ئاشكرایكرد، برینی سیانیان سووتاوی بووە و برینەكانیان سووك بوون و لە نەخۆشخانە چارەسەری پێویستیان بۆ كراوە.
وتەبێژی تەندروستیی سلێمانی وتیشی، بریندارەكەی دیكە شۆفێری تانكەرەكە بووە و بەهۆی خۆهەڵدانی لە ئۆتۆمبێلەكەوە برینداربووە و ڕەوانەی نەخۆشخانەی شەهید شەوكەت لە شارەزوور كراوە.
ئەمڕۆ پێنجشەممە تانكەرێكی گواستنەوەی سووتەمەنی لەبەردەم تونێلی دەربەندیخاندا وەرگەڕا و دواتر تەقییەوە و چەند ئۆتۆمبێلێكی دیكەش سووتان.
