بەرەبەیانی ئەمڕۆ لە کافتریایەکی هەولێر، تانکییەکی ئاو لەسەربانەوە دەکەوێتەخوارەوە و بەر کارمەندێکی چێشتخانەی کافتریاکە دەکەوێت و گیانلەدەستدەدات.
ڕووداوەکە لە کاتژمێر 2:00ی بەرەبەیانی ئەمڕۆ لە شەقامی 40 مەتریی هەولێر ڕوویداوە.
لە لێدوانێکدا بۆ تۆڕی میدیایی ئێستا سەرکەوت کاڕەش وتەبێژی بەرگریی شارستانیی هەولێر ڕایگەیاند، ڕووداوەکە لە کافتریایەک بەناوی چوکلێت ڕوویداوە، بەهۆی ئەوەی سەقفی کافتریاکە شێلمان بووە و تەنکییەکەی لەسەر دانراوە ڕووخاوە.
تانکییەکە کەوتووەتە ناو چێشتخانەی کافتریاکە و بەهۆیەوە بەر کارمەندێکی ناو چێشتخانەکە کەوتووە و گیانیلەدەستداوە.
ئەو کرێکارە ناوی محەمەدە، لەدایکبووی 2003یە و خەڵکی دیمەشقی سوریایە.
پەڕاوی لێکۆڵینەوە بۆ ڕووداوەکە کراوەتەوە و پۆلیسی هەولێر لێکۆڵینەوە لە ڕووداوەکە دەکات.
