ئاسۆ كەمال بەڕێوەبەری كەشناسی و بومەلەرزەزانیی سلێمانی، ڕوودانی بومەلەرزەیەكی لە خۆرهەڵاتی كوردستان ئاشكراكرد كە بەرەبەیانی ئەمڕۆ ڕوویداوە و دەڵێت، كرماشان و قەسری شیرینی هەژاندووە.
لە لێدوانێكدا بۆ تۆڕی میدیایی ئێستا، ئاسۆ كەمال بەڕێوەبەری كەشناسی و بومەلەرزەزانیی سلێمانی ڕایگەیاند، بەرەبەیانی ئەمڕۆ كاتژمێر 3:54 خولەك بە كاتی كوردستان، بومەلەرزەیەك بە گوڕی 3.4 پلە بە پێوەری ڕێختەر ناوچەكانی كرماشان و قەسری شیرینی هەژاندووە بە قووڵیی 15 كیلۆمەتر و دووریی 23 كیلۆمەتر لە خانەقینەوە. بومەلەرزەكە لە خانەقین و ناوچەكانی گەرمیان هەستیپێكرا.
لەبارەی هەڵكەوتەی جوگرافیی كوردستان و كاریگەرییەكانی بومەلەرزە لەسەری، بەڕێوەبەری كەشناسی و بومەلەرزەزانیی سلێمانی وتی، هەرێمی كوردستان دەكەوێتە لێواری پلێتی تێكتۆنیی عەرەبی كە هاوسێیە لەگەڵ پلێتی تێكتۆنیی ئۆراسیا و نزیكە لە پشتێنەی بومەلەرزەیی كە لە ناوچەكانی ئەڵپەوە درێژدەبێتەوە و بە ناوچەكانی جەبەل تاڕق و دەریای ناوەڕاست و شاخەكانی تۆرۆس و زاگرۆس-دا تێپەڕدەبێت و دادەكشێتەوە بۆ چیای هێمالایا و بومەلەرزە لەم ناوچانەدا ڕوودەدات.
