بەهۆی ڕووداوێكی هاتوچۆ لەسەر شەقامی 120 مەتریی هەولێر شۆفێرێك گیانیلەدەستدا و سەرنشینێكیش بەسەختی برینداربوو.
فازڵ حاجی وتەبێژی بەڕێوەبەرایەتیی هاتوچۆی هەولێر ڕایگەیاند، كاتژمێر 1:30 خولەكی بەرەبەیانی ئەمڕۆ لەسەر شەقامی 120 مەتری لە نزیک بەشی مۆڵەتی هاتوچۆی هەولێر نیسان ماکسیمایەکی تایبەت کە شۆفێر و سەرنشینێکی تێدابوو بەخێراییەکی زۆرەوە لە دیوی فڕۆکەخانەوە بەئاراستەی ڕێگای کەرکوک دەڕۆیشت، لەناکاو بەهۆی تیژڕەوییەکەی کۆنتڕۆڵی لەدەستدا و بەرەو ڕاگری سەر ناوبڕەی شەقامەکە ڕۆیشت و خۆی پێداکێشا.
دواتر خۆی کێشا بە دوو ستونی کارەبا یەک لەدوای یەک، کە دووریی نێوانیان نزیکەی 70 مەترە، پاشان بەردەوام بوو تاکو گەیشتە ستونی سێهەم و خۆی بەویشدا کێشا و وەستایەوە، وەك ئەوەی فازڵ حاجی دەیڵێت.
ئەوەشی وت، “بەداخەوە لە دەرەنجامی ڕووداوەکە شوفێرەکە گیانی لەدەستدا و سەرنشینێکیش بەسەختی زامدار بوو”.
سەبارەت بە زیانە مادییەكانیش سەرەڕای ئۆتۆمبێلەكە، سێ ستونی كارەبا كەوتووە و 75 مەتر گاردێلی ڕێگایەکە تێکچووە. وتەبێژی هاتوچۆی هەولێر دەڵێت، “بڕی زیانەکان و دووری نێوان ستونەکان و کەوتنیان و کەوتنی ئەو هەموو گاردێلە خۆی گەواهیدەری خێرایی ئوتومبێلەکەیە بەر لە ڕووداوەکە”.
ئاماژە بەوەشدەكات، هەر کەسێک ئێستا بەو شوێنەدا تێپەڕێت و زیانەکان ببینێت، بەهۆی نزیکی شوێنەکە لە فڕگەی فڕۆکەخانەی هەولێر، ڕەنگە وای بۆ بچێت فڕۆکەیەک لەو شوێنە كەوتووەتە خوارەوە.
