مەلا كامەران عەلی، داخستنی ئەو شوێنانەی دوورن لە بەها ئایینی و كۆمەڵایەتییەكان بە “هەڵوێستێكی جوان” ناودێردەكات و دەڵێت، “25 ساڵە نەمتوانیوە بڕۆم لە سەرچنار چایەک بخۆمەوە”.
مەلا كامەران عەلی یەكێك لە مامۆستا ئایینییە دیارەكان سلێمانی، داخستنی ئەو شوێنانەی گەڕەكی سەرچنار كە دوورن لە بەها ئایینی و كۆمەڵایەتییەكان بە “هەڵوێستێكی جوان” ناودێردەكات و وەك خۆی دەڵێت، سوپاس و پێزانین و نرخاندنیان بۆ ئەو بڕیارەی بافڵ جەلال تاڵەبانی، سەرۆكی یەكێتیی نیشتمانیی كوردستان هەیە و هیواخوازن سەرەتایەك بێت بۆ ئاشتكردنەوەی خەڵك.
لە لێدوانێكدا بۆ تۆڕی میدیایی ئێستا، مەلا كامەران هیوایخواست ئەو چاكسازی و پاكسازییانە گشتگیربن و شارەكانی تریش بگرنەوە و داوایكرد كاربكرێت بۆ گەڕاندنەوەی رەسانەیەتی بۆ شارەكان.
ئەو مامۆستا ئایینییە پیرۆزبایی لە دانیشتووانی گەڕەی سەرچنار كرد و وتیشی، “جاران هەموو سەیران و گەڕانێكی خۆم و خانەوادەكەم لە سەرچنار بوو، بەڵام ماوەی 25 ساڵە نەمتوانیوە بڕۆم لەوێ چایەك بخۆمەوە”.
