پارێزگاری شارۆچکەیەکی نزیکی کیێڤ ڕایگەیاند، پاش ڕۆیشتنی سەربازەکانی ڕوسیا، تەرمی دەیان هاوڵاتی دۆزراونەتەوە.
ئەمڕۆ فادیم توکار پارێزگاری شارۆچکەی ماکارێڤ ڕایگەیاند، “تا دوێنێ تەرمی 132 کەسی مەدەنیمان دۆزیوەتەوە، کە هێزەکانی ڕوسیا کوشتویانن”.
پێشتر هێزەکانی پۆلیس ڕایانگەیاندبوو، لایەنی کەم 20 تەرمیان لە ماکارێڤ دۆزیوەتەوە.
هەروەها توکار ڕایگەیاندووە، چەندین باڵەخانەی شارۆچکەکە بەڕادەیەک وێرانبوون، نۆژەن ناکرێنەوە و ماوەی مانگێکیشە ماکارێڤ نە ئاو و نە کارەبای هەیە.
تەرمەکان ژمێردران و ڕاگەیەندران، پاش ئەوەی سەربازەکانی ڕوسیا پاشەکشەیانکرد و هێزەکانی ئۆکرانیا شارۆچکەکەیان گرتەوەدەست.
ماکارێڤ دەکەوێتە خۆرئاوای شاری کیێڤەوە و تەنیا 28 کیلۆمەتر لە بوچاوە دوورە، ئەو شارۆچکەیەی لە هەفتەی پێشوودا بووە باسی میدیا جیهانییەکان، پاش ئەوەی تەرمی سەدان کەس لە دانیشتوانیان دۆزیەوە بە دەستی سەربازەکانی ڕوسیا کوژرابوون.
پێشتر، مۆسکۆ لەلای خۆیەوە تێوەگلانی هێزەکانی لە ئەنجامدانی “تاوانی جەنگ”دا ڕەتکردووەتەوە پرسەکەی و بە پڕوپاگەندەیەک لەقەڵمداوە، کە دەستکردی کیێڤە.
a
