ئەنجومەنی مامۆستایانی ناڕازی، داوادەكەن حكومەتی عێراق خۆی مووچەی مووچەخۆرانی هەرێم دابەشبكات و وردبینی لە داهاتی نەوت و خاڵە سنوورییەكاندا بكات.
لە كۆنگرەیەكی ڕۆژنامەوانیدا كە ئەمڕۆ لە نووسینگەی سلێمانیی ئەنجومەنی نوێنەران ڕێكخرا، ئەنجومەنی مامۆستایانی ناڕازی یاداشتێكیان ئاراستەی حكومەتی عێراق كرد و داوایان كرد كێشەكانیان چارەسەربكات.
مامۆستایانی ناڕازی داوایانكرد حكومەتی عێراق بەشێوەیەكی ڕاستەوخۆ و لەڕێگەی بانكەكانییەوە مووچەی مامۆستایان و فەرمانبەرانی هەرێم دابەشبكات و وردبینی بكات لە داهاتی نەوت و خاڵە سنوورییەكانی هەرێمی كوردستان.
ئەنجومەنی مامۆستایانی ناڕازی داواكاربوون دەسەڵاتە فیدراڵییەكانی عێراق بەدەم داواكارییەكانیانەوە بچن و وتیان، “بۆچی دەسەڵاتە فیدراڵییەكان بێدەنگن بەرامبەر ئەو هەموو ستەمەی دەرهەق بە مامۆستایان و فەرمانبەران و بەشێكی گرنگی كۆمەڵگەی عێراقی دەكرێت؟”.
ئەنجومەنی مامۆستایانی ناڕازی، دەسەڵاتدارانی هەرێمی تۆمەتباركرد بەوەی نایانەوێت كێشەكان چارەسەربكەن و داوایان لە ئەنجومەنی نوێنەران كرد یاسایەك دەربچوێنێت بۆ ئەوەی كۆتایی بهێنێت بە یاریكردن بە بژێویی خێزان و منداڵەكانیان.
