هەواڵێك بۆ ئەوانەی لە حكومەتی ناوەندی مووچە وەردەگرن

بانكی ڕافیدەین ئاشكرایكرد، ئەو پێشینەیەی 25 ملیۆن دینارە و دەدرێت بە فەرمانبەران و خانەنشینان، كارمەندانی هەردوو وەزارەتی بەرگری و ناوخۆش دەگرێتەوە.

لە ڕاگەیەندراوێكدا كە ئەمڕۆ شەممە بڵاویكردەوە، بانكی ڕافیدەین ڕایگەیاند، پێشینەی 25 ملیۆن دیناری كارمەندانی هەردوو وەزارەتی بەرگری و ناوخۆ دەگرێتەوە و ئەوانیش دەتوانن سوودمەندببن لەو پێشینەیە.

بانكەكە ڕوونیكردەوە، ئەوانەی دەیانەوێت ئەو پێشینەیە وەربگرن، دەتوانن لە لقەكانی بانكی ڕافیدەین لە بەغداد و پارێزگاكانی تر مامەڵە پێشكەشبكەن.

لەبارەی شێوازی دانەوەی پارەكەوە ڕاگەیەندراوەكە دەڵێت، پێشینەكە بە پێنج ساڵ دەدرێتەوە و ڕێژەی 5% سوودی دەخرێتەسەر.

لە ماوەی ڕابردوودا هەردوو بانكی ڕەشید و ڕافیدەین  ڕایانگەیاندبوو، قەرزی 15 ملیۆن دیناری دەدرێت بە هاوڵاتییان و ماوەی دانەوەی قەرزی 50 ملیۆن دینارییش لە 10 ساڵەوە بۆ 15 ساڵ درێژكراوەتەوە.

ئەو قەرزە 50 ملیۆن دینارییەی كە دەدرێت بە هاوڵاتییان، بەمەبەستی دروستكردنی خانوو یاخود نۆژەنكردنەوەیەتی و فەرمانبەران و خانەنشینان و هاوڵاتییان دەتوانن وەریبگرن.

هەفتەی ڕابردوو بانكی ڕافیدەین ئاشكرایكردبوو، 10 ملیۆن دینار وەك پێشینە دەدات بە خوێندكار، مامۆستا یاخود هەر توێژەرێك بەمەبەستی ئەنجامدانی توێژینەوەی زانستی.