پەرلەمانتارێكی فراكسیۆنی یەكێتی لە ئەنجومەنی نوێنەران ڕایدەگەیەنێت، یەكێتیی پۆستی سەرۆك كۆمار وەردەگرێتەوە و سازشی لەسەر ناكەن و دەڵێت “هەڵبژاردن كراوە و سەرۆكی ئەنجومەنی نوێنەران بۆ سوننە بووە و سەرۆكی حكومەت بۆ شیعە و سەرۆك كۆمار بۆ كورد و یەكێتی دەبێت.”
غەریب ئەحمەد، پەرلەمانتاری فراكسیۆنی یەكێتیی نیشتمانیی كوردستان لە ئەنجومەنی نوێنەرانی عێراق لەلێدوانێكدا بە تۆڕی میدیایی ئێستای ڕاگەیاند، شەقامی عێراقیی لەگەڵ ئەوەن پۆستی سەرۆك كۆمار هەر بۆ یەكێتی بێت و ئەو بابەتە یەكلابووەتەوە ئێمە سازشی لەسەر ناكەین.
ئاماژەی بەوەكرد، “یەكێتیی لە گۆڕەپانی سیاسیی عێراقدا مامەڵەی لەگەڵ دەكرێت و قورسایی خۆی هەیە و بەشێكی زۆری پەرلەمانتارانی ڕەوتی سەدر و سوننەكان لەگەڵ ئەوەن بەرهەم ساڵح، كاندیدەكەی یەكێتیی پۆستی سەرۆك كۆمار وەربگرێتەوە و ڕێز لە ڕێككەوتنەكەیان دەگرن ئەگەر نا ئامادەن دەنگ بە كاندیدەكەی یەكێتی بدەن”.
پەرلەمانتارەكەی یەكێتی باسی لەوە كرد، ” لایەنە عێراقییەكان دڵنیان یەكێتیی مامەڵەی تەندروست لە پۆستی سەرۆك كۆمار دەكات”.
غەریب ئەحمەد پێیوایە، هەڵبژاردن كراوە و سەرۆكی ئەنجومەنی نوێنەران بۆ سوننە یەكلابووەتەوە و سەرۆكی حكومەت بۆ شیعەیە و سەرۆك كۆمار بۆ كورد و یەكێتی دەبێت.
پەرلەمانتارەكەی یەكێتی دەڵێت” پارتی ڕێككەوتنی لەگەڵ سەدر و سوننەكان كرد و ناو ماڵی كوردی تێكدا و تاكڕەوانە هەنگاوی ناوە”.
