سەرۆكی دەستەی دەسپاكیی هەرێم دەڵێت، لە سەرەتای ساڵی ڕابردووەوە كاریان لەسەر دۆسیەی خانەنشینانی نایاسایی كردووە و ڕوونیدەكاتەوە، هەر بڕیارێك لەبارەیانەوە لە دەسەڵاتی ئەنجومەنی وەزیراندایە.
ئەحمەد ئەنوەر، سەرۆكی دەستەی دەسپاكیی هەرێمی كوردستان بە تۆڕی میدیایی ئێستای ڕاگەیاند، لە مانگی كانوونی یەكەمی ساڵی 2021ـەوە لەگەڵ زۆربەی وەزارەتەكان كۆبوونەوەیان لەسەر ئەو دۆسێیانە ئەنجامداوە، هەفتەی ڕابردوو دوایین وەزارەت كە كۆبوونەوەیان لەگەڵدا كردوون، وەزارەتی كاروباری شەهیدان و ئەنفالكراوان بووە.
وتیشی، “دەزگاكەی ئێمە چاودێرییە، بەدواداچوون بۆ سەرجەم ئەو بابەتانە دەكات كە باس لە نایاساییبوونیان دەكرێت، بەڵام بڕیاردەر ئەنجومەنی وەزیران، لیژنەی باڵای چاكسازی و فەرمانگەی هەماهەنگی و بەدواداچوونی ئەنجومەنی وەزیرانن”.
بەپێی یاسای چاكسازی، بڕیاربوو پێداچوونەوە بەو مووچانەی خانەنشینیی باڵا بكرایە، كە بە نایاسایی كراون، بەڵام ژمارەیەك لە پەرلەمانتاران لە چەند ڕۆژی ڕابردوودا باسیان لەوە كرد، مووچەی خانەنشینانی نایاسایی نەبڕدراوە.
سەرۆكی دەستەی دەسپاكی لەگەڵ ئەوەدا نییە “ئەو كەسانەی پێشتر خزمەتیان نەبووە و خانەنشینكراون و ئێستا مووچە وەردەگرن، بە خانەنشینی نایاسایی ناوببرێن”، ئەو ناویدەنێت “جۆرێك لە بەهەدەردانی سامانی گشتی”، چونكە پێشتر لە حكومەتەوە خانەنشینكراون.
سەرەڕای ئەوە، ئەحمەد ئەنوەر دووپاتیكردەوە، “سەرجەم ئەو دۆسێیانەی گومانیان لەسەرە لەبارەی خانەنشینان و پلەی خانەنشینبوونیان، دەكەینە ڕاپۆڕت و بەرزیدەكەینەوە بۆ ئەنجومەنی وەزیران و دەسەڵاتی جێبەجێكردن، ئەوە ئەوانن كە بڕیاریان لەبارەوە دەدەن”.
یەكشەممەی ڕابردوو عه‌لی حه‌مه‌ساڵح، ئەندامی پەرلەمانی كوردستان ڕایگەیاند، “یاسای چاكسازی له‌سه‌ر كاغه‌ز شتی باشه، ساڵێك و هه‌شت مانگه یاساكه كه‌وتووه‌ته بواری جێبه‌جێكردنه‌وه، بەڵام تائێستا مووچه‌ی هیچ كه‌س له‌وانه‌ی به نایاسایی خانه‌نشینكراون ڕانه‌گیراوه”.
وتیشی، “تائێستا مووچه‌ی ئه‌و كه‌سانه‌ی كه به وه‌زیر، بریكاری وه‌زیر و پله‌ی سه‌ربازیی باڵا خانه‌نشینكراون هیچیان ڕانه‌گیراون، هه‌روه‌ها به‌پێی یاساكه ده‌بوو پاسه‌وانی ڕێكبخرێته‌وه، دوای ساڵێك و هه‌شت مانگ تائێستا به‌رپرس هه‌یه فه‌وج و سریه‌ی هه‌یه”.
