لە ساڵیادی ڕاپەڕینی شاری سلێمانی-دا، بافڵ جەلال تاڵەبانی پەیامێكی بڵاوكردەوە و دەڵێت، “بەڵێنتان پێدەدەم جارێکیتر ڕێگەنادەین سلێمانی ببێتە قوربانیی ململانێکان و غەدر لە سلێمانی و مێژووە پڕ لە سەروەرییەکەی بکرێت”.
بافڵ جەلال تاڵەبانی، ئەمڕۆ دووشەممە پەیامێكی بەبۆنەی تێپەڕبوونی 31 ساڵ بەسەر ڕاپەڕینی شاری سلێمانی دژی ڕژێمی بەعس بڵاوكردەوە و ڕایگەیاند، “دەزانین دروشمی زۆر بەرزکراونەتەوە و مژدەی گەورە بە سلێمانی دراوە، بەڵام بەمەبەست بووبێت یان نا فەرامۆشکراون”.
جەختدەكاتەوە، “بەڵێنتان پێدەدەم جارێکیتر ڕێگەنادەین سلێمانی ببێتە قوربانیی ململانێکان و غەدر لە سلێمانی و مێژووە پڕ لە سەروەرییەکەی بکرێت. داهاتووش ڕوونیدەکاتەوە کوڕە دڵسۆزەکانی سلێمانی کێن و کێ شان دەخاتە ژێر باری بەرپرسیارێتییەکان”.
دەقی پەیامەكە:-
ئەمڕۆ یادی ڕاپەڕینی سلێمانی دەکەینەوە، یادی شارێک کە هەمیشە سەرچاوەی وزە و هێزی بەردەوامیمان بووە. ئەو شارەی مام بە (شارە حەیاتەکە) ناوی دەهێنا و هەرواش دەمێنێتەوە.
سلێمانی هەمیشە سەربڵند و شکۆمەند بووە، بێدەنگ نابێت و پاشکۆبوون ڕەتدەکاتەوە. لەبەرامبەر هیچ هێزێک خۆی نەوی ناکات و وەک چیاکانی خۆڕاگر و پتەو دەمێنێتەوە. بەردەوام لەنوێبوونەوەدایە و زیندووێتیی خۆی ون ناکات. لە ڕۆژانی خەبات دژی زوڵم و ستەم، سلێمانی بوو ڕۆڵەکانی خۆی دەکردە قوربانیی ئازادی و سەرفرازی بۆ هەموو کوردستان. لە خەباتی دیموکراسی و مەدەنیشدا هەر خۆی سەرمەشق بووە و مێژوو شایەتی ئەم ڕاستییانە دەدات.
دەزانین دروشمی زۆر بەرزکراونەتەوە و مژدەی گەورە بە سلێمانی دراوە، بەڵام بەمەبەست بووبێت یان نا فەرامۆشکراون. بۆیە لەم یادە پیرۆز و شکۆدارەدا بەڵێنتان پێدەدەم جارێکیتر ڕێگەنادەین سلێمانی ببێتە قوربانیی ململانێکان و غەدر لە سلێمانی و مێژووە پڕ لە سەروەرییەکەی بکرێت. داهاتووش ڕوونی دەکاتەوە کوڕە دڵسۆزەکانی سلێمانی کێن و کێ شان دەخاتە ژێر باری بەرپرسیارێتییەکان.
سڵاو لە ڕۆحی پاکی شەهیدان
سەربەرزی و سەرفرازی بۆ خەڵکی شارە حەیاتەکە و سەرجەم خەڵکی خۆشەویستی کوردستان.
بافڵ جەلال تاڵەبانی
