سەرۆكی ئۆكرانیا ڕەتیدەكاتەوە كیێڤی پایتەختی جێهێشتبێت، دەڵێت، “ڕامنەكردووە”.
دوێنێ دەنگۆی ئەوە بڵاوبووەوە ڤۆلۆدیمێر زیلینسكی سەرۆكی ئۆكرانیا كۆشكی سەرۆكایەتی و كیێڤی پایتەختی جێهێشتووە و هەڵاتووە، بەڵام بە ڤیدیۆیەك، كە خۆی بە مۆبایلەكەی تۆماریكردووە، دەنگۆكەی ڕەتكردەوە.
زیلینسكی دەڵێت، “هەموو ڕۆژێك دەنگۆی هەڵاتنم لە ئۆكرانیا و كیێڤ بڵاودەكرێتەوە، بەڵام وەك دەبینن، من لێرەم، لە ماڵەكەی خۆم، كەس ڕاینەكردووە، ئێمە كاردەكەین”.
سەرۆكەكەی ئۆكرانیا، كە پێشتر ئەكتەری كۆمیدی بووە، هەر بە گاڵتەئامێزییەوە دەڵێت، “ئێمە حەزمان لە (هەروەلە – ڕاگردن بە هێواشی)یە، بەڵام ئێستا كاتی ڕاهێنانە وەرزشییەكان نییە، چونكە كاردەكەین”.
لە كۆتاییشدا دەڵێت، “سەركەوتن بۆ ئۆكرانیا، سەركەوتن بۆ پاڵەوانەكان، مردن بۆ ئەوانەی هەڵدێن”.
