پۆلیسی گەرمیان ڕایدەگەیەنێت، هێزەكانیان چوار كەسیان دەستگیركردووە كە ماسی نەشیاویان لە دەرەوە هێناوە و ویستوویانە بە هاوڵاتیانی بفرۆشنەوە.
عەلی جەمال قدوری، بەرپرسی ڕاگەیاندنی پۆلیسی گەرمیان ئەمڕۆ شەممە 14ی تشرینی دووەم وتی، ڕۆژی هەینی بەشی پۆلیسی نەهێشتنی تاوانی گەرمیان لەهەفتەبازاڕ (مەزادخانە)ی کەلار دەستیانگرت بەسەر 100 کیلۆ ماسی خراپ بوو کە بۆ خواردن شیاونەبووە و دەیانویست بە هاوڵاتییانی بفرۆشنەوە.
وتیشی، “ماسییەكان لە دەرەوەی سنوری کەلار هێنراون و تێکەڵاوی ماسی تەندروست كراون”.
بەرپرسەكەی پۆلیسی گەرمیان ئاشكراشیكرد، لەئێستادا بە بڕیاری دادوەر و بەپێی مادەی 368، چوار تۆمەتبار دەستگیرکران و سەرجەم ماسیە خراپبووەکانیش ڕادەستی لیژنەی چاودێری قایمقامیەتی کەلار کران و دواتر لەلایەن لیژنەكەوە لەناوبران.
