قەیرانی ئۆکرانیا و ناکۆکیی نێوان ئەمریکا و ڕوسیا لەبارەی ئەو دۆسیەیەوە، هێزی زیاتری لە ئەوروپا و دەوروبەری کۆکردووەتەوە، بەجۆرێک ئەمریکا وەک پشتگیرییەک لە هاوپەیمانەکانی کەرەستەی سەربازیی ڕەوانەی چەند وڵاتێکی ئەوروپی دەکات.
هێشتا دەرگای گفتوگۆ لەنێوان هاوپەیمانانی ئەمریکا و ڕوسیا لەبارەی قەیرانی ئۆکرانیاوە دانەخراوە، بەڵام ئەوە نەبووەتەهۆی وەستانی جووڵەی سەربازی و ئەمریکا لە پۆڵەندا و ڕۆمانیا هێز و کەرەستەی سەربازی جێگیرکردووە.
ڕوسیا وەک لایەنێکی قەیرانەکە کەشتیی سەربازی ڕەوانەی دەریای ڕەش کردووە و مانۆڕی سەربازیی ڕوسیاش لەسەر دەریای ڕەش و ئۆکرانیا بەردەوامە.
حکومەتی پۆڵەندا ڕایگەیاند، ماوەی هەفتەیەکە فڕۆکەی ئەمریکی لە چەند بنکەیەكی سەربازیی وەک بنکەی ” Łask” جێگیرکراون، ئەمڕۆ کاروانێکی دیکەی فڕۆکەی f15ی ئەمریکی بۆ هەمان بنکە نێردراون.
ئەمریکا لە ڕۆمانیا و پۆڵەندا هێزی سەربازی و کەرەستەی سەربازی لە سنووری هێزەکانی ناتۆدا کۆدەکاتەوە و ڕوسیاش لەسەر مانۆڕەکانی بەردەوامە.
گفتوگۆی ئەوروپا و ڕوسیا لەبارەی ئەو پرسەوە بەردەوامە و لە ماوەی هەفتەیەکدا گفتوگۆی نێوان ڕوسیا و فەرەنسا و بەریتانیا بەردەوامی هەبووە.
