دادگای سلێمانی دەنگۆی فرۆشتنی باڵەخانەی دادگاكە و كردنی بە پڕۆژەی بازرگانی ڕەتدەكاتەوە و بەڵێنی ڕێوشوێنی یاسایی بەرامبەر بڵاوكردنەوەی “هەواڵی ناڕاست”ی لەوجۆرە دەدات.
سەرۆكایەتیی دادگای تێهەڵچوونەوەی ناوچەی سلێمانی ڕوونكردنەوەیەكی بڵاوكردەوە و تیایدا دەڵێت، “لە چەند پەیجێكی فەیسبووك و میدیای ئەلیكترۆنیدا هەواڵێك بڵاوكراوەتەوە گوایە بینای دادگای تێهەڵچوونەوەی سلێمانی فرۆشراوە، ئێمە لە سەرۆكایەتیی دادگای تێهەڵچوونەوەی ناوچەی سلێمانی وێڕای ئەوەی ئەو هەواڵە بێبنەما و ناڕاستە بەدرۆدەخەینەوە، ئەو جۆرە هەواڵ و نووسراوانە بە چەواشەكاری دەزانین، كە مەبەستیان تێكدانی میزاجی هاوڵاتییان و شڵەژانی ئاشتیی كۆمەڵایەتییە”.
سەرۆكایەتیی دادگای تێهەڵچوونەوە ئاماژە بەوەشدەكات، سكاڵا لەدژی هەر سایت و پەیج و ئەكاونت و دەزگایەكی ڕاگەیاندن دەجوڵێنن كە “ئەو هەواڵە ناڕاستەیان بڵاوكردووەتەوە” و ڕێكاری یاسایی توند و پێویستیان بەرامبەر دەگرنەبەر، تا “پەندی لێوەربگیرێت و چیتر هاوڵاتیان لەخشتەنەبرێن و یاری بە میزاج و هەستیان نەكرێت”.
لەكاتێكی پێشتری ئەمڕۆدا لە هەندێك لە پەیج و تۆڕە كۆمەڵایەتییەكاندا دەنگۆیەك بڵاوكرایەوە بەوەی بینای دادگای نوێی سلێمانی، كە دەكەوێتە دەروازەی شار، فرۆشراوە و دەكرێت بە باڵەخانە و شوێنی نیشتەجێبوون.
