وتەبێژی حکومەتی ئەرجەنتین ڕایگەیاند، کاتێک موحسین ڕەزایی سەردانی وڵاتی ”نیکاراگوا”ی کرد، دەبوو دەستگیربکرایە، ئەوە بە پشتبەستن بە بڕیاری دادگای ئەرجەنتین بۆ دەستگیرکردنی ئەو بەرپرسەی سوپای پاسداران لە ساڵی 2006دا.
ساڵی 1994 ناوەندی کۆبوونەوەی جوولەكەكەكان لە وڵاتی ئەرجەنتین بە تەقینەوەیەک کرایە ئامانج، لە ڕووداوەکەدا 85 کەس کوژران، دواتر ئاشکرابوو، کە لەلایەن گروپێکی سەر بە ئێرانەوە تەقینەوەکە ئەنجامدراوە و موحسین ڕەزایی یەکێک بووە لە پلاندانەرانی ئەو ڕووداوە.
دوای لێکۆڵینەوە لە ڕووداوەکە، دادگای ئەرجەنتین چەندین بەرپرسی سوپای پاسدارانی وەک بەرپرسیاری ڕووداوەکە دەستنیشانکرد و بڕیاری دەستگیرکردنەکەشی ڕادەستی پۆلیسی ئینتەرپول کردووە، موحسین ڕەزایی-ش کە ئێستا ئەندامی ئەنجومەنی دەستنیشانکردنی بەرژەوەندییەکانی ئێرانە یەکێکە لەو کەسە دەستنیشانکراوانە.
وتەبێژی حکومەتی ئەرجەنتین لە تویتێکدا ڕەخنەی لە بەرپرسان و سیاسەتی وڵاتەکەشی گرت، بەوەی کاتێک موحسین ڕەزایی سەردانی “نیکاراگوا”ی کرد، باڵیۆزی ئەرجەنتین لە ڕێوڕەسمە سیاسییەکەدا لەگەڵ ڕەزایی بەشداریکردووە، لە کاتێکدا پۆلیسی ئینتەرپول دەبوو ڕەزایی دەستگیربکردایە.
ئێران هەوڵدەدات بە نزیکبوونەوە لە وڵاتانی ئەمریکای لاتین هەژموونی خۆی لە نزیک ئەمریکا بەهێزبکات، هەژموونی ئێران لە وڵاتانی ڤێنزوێلا و نیکاراگوا و نزیک نۆکەندی پەنەما مەترسییەکە ڕەنگە ئەمریکاش بە هەستیارییەوە مامەڵەی لەگەڵ بکات.
