کارگێڕی یانەی بایرن میونشن هەڵەی داڤید ئالابا دووبارە ناکاتەوە و بڕیاریانداوە بەر لە کۆتاییهاتنی ئەم وەرزە بۆندی سێ یاریزانی پێکهاتەکەیان نوێبکەنەوە.
ئیدارەی بایرن لە کۆتا جوڵەیاندا ئۆفەرە پێشکەشکراوەکانیان کشاندەوە، ئەم بڕیارەش دەرگا بەڕووی یاریزانە نەمساییەکەدا دەکاتەوە بۆندەکەی بە ویستی خۆی و دوای کەمکردنەوەی داخوازییەکانی نوێبکاتەوە، یان ڕوو لە یانەیەکی دیکە بکات.
ڕۆژنامەی بێلد سپۆرتی ئەڵمانی بڵاویکردووتەوە، لە دوای زنجیرەیەک کۆبوونەوەی نێوان هێربەرت هاینەری سەرۆک و کارڵ هاینز ڕۆمەنیگەی بەڕێوبەری جێبەجێکار، لە پێناو پاراستنی یاریزانە لاوە گرنگەکان و دووبارە نەبوونەوەی هەڵەی ئالابا، بڕیاری نوێکردنەوەی بۆندی سێ یاریزان دراوە.
هاینەر دەڵێت، ” پێکهاتەیەکی بەهێز و گەنجمان هەیە، هەوڵدەدەین بۆ ماوەیەکی دوورودرێژ بەردەوامییان پێبدەین”.
بەپێی زانیارییەکانی بێلد، یاریزانە نوێیەکان دەخرێنە بەردەم پڕۆسەی نوێکردنەوەی بۆندەکانیان، تاوەکو هاوشێوەی ئالابا بیر لە ڕۆیشتن نەکەنەوە و یانەکەش دووچاری ئاستەنگی دارایی نەبێت.
یەکەم دانوستاندنەکان لەگەڵ لیۆن گۆرێتزکا ئەنجامدەدرێت، پاشان لەگەڵ نیکلاس سولی کە بۆندەکانیان لە هاوینی 2022 کۆتاییدێت، پڕۆسەکە جۆشوا کیمیچیش دەگرێتەوە سەرەڕای ئەوەی بۆندەکەی تاوەکو هاوینی 2023 بەردەوامی هەیە.
